E Weganan Panamericano 2019 ta dos aña y mei leu y lo tuma lugar na e ciudad di Lima, Peru. Asina mes ya caba e diferente preparacionnan a cuminsa pa loke ta e competencianan y aki e Federacion Peruana de Bowling ta un di esnan prome cu lo organisa un asina yama Encuentro Panamericano de Bowling “Ciudad de Lima” unda algun pais invita lo forma parti di e torneo aki. Mirando e prestacion den e ultimo añanan di nos bolicheronan local den e continente America, Aruba mas cu claro lo forma parti di e evento unico aki.
Mester bisa si cu e delegacion di Aruba lo consisti di solamente di un ekipo di cabayero mirando cu den e dama nan tin algun lesion como tambe scol mientras otronan tin compromiso di trabou. E bolicheronan masculino cu lo representa Aruba ta Yannick Roos, Renald Thiel, Anthony Tjin Kon Fat Jr. y Errol Brown. Como coach nos tin Anthony Tjin Kon Fat Sr y Hefe di Delegacion tambe lo biaha coach Chris Dammers y Randy Thiel. E paisnan participante den cabayero lo ta Aruba, Colombia 1, Colombia 2, Costa Rica, México, Venezuela, Perú 1 y Perú 2. Mester bisa cu e miho hungadornan lo ta formando parti di e torneo aki y mas cu claro pa nos hungadornan ya caba esaki lo ta e prome salida como nan preparacion pa e calendario di anja 2017 cu mira pa e Weganan Panamericano di Lima Peru 2019.
Un danki na Lotto, e loteria di Aruba cu pa medio di Comision di Subsidio a subsidia e biaha di e delegacion di bowling pa e Prome Encuentro Panamericano de Bowling “Ciudad de Lima”
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.