E dianan 29 di maart pa 3 di april, e pais di Surinam lo host e di 7 edicion di e competencia di e Carifta Junior Chess Championship 2018. Tur wega lo wordo hunga na e capital surnameo di Paramaribo. Mas cu claro e federacion di ahedrez di Aruba tambe a ricibi e invitacion pa participa na e torneo aki. Mester bisa cu Carifta tin e categorianan di U12, U16 y U20 absoluto y femenino mientras cu nos lo participa tambe den e categorianan di U8 y U14. Mester bisa cu a prepara un seleccion fuerte pa competi na e Carifta Chess aki unda e federacion a escohe nan miho hungadornan di chess pa representa nos dushi isla. Esnan cu bataya pa Aruba na Surnam ta Thamara Sagastegui den e categoria U12 femenino. Tambe nos tin Ayden Dirksz cu lo ta den e U16 absoluto, e hungador Brian Diaz lo ta den e U20 absoluto. Den e categoria U8 a opta pa manda Sylvi Cabral, den U14 lo manda Ilya Stetsenko, Kyell Jean Antonio y Ethan Croeze. E lider di delegacion di Aruba lo ta Carol Pesquiera. Hungadornan cu lo wordo subsidia ta Thamara Sagastegui, Ayden Dirksz y Brian Diaz hunto cu e lider di delegacion.
Ta bon pa bisa cu na 2016, e delegacion di Aruba a haci historia door di logra un di dos luga den e clasificacion general tras di e ganadonan Barbados y dilanti di Surnam den e Carifta Chess Championship teni na St. Criox. Aruba a logra un total di 7 medaya y 4 trofeo individual, cu e tempo ey Thamara Sagastgui cu a logra prome luga den U-10 y medaya di Oro, Ethan Croeze cu di tres luga den U-12 y medaya di Brons, Brian Diaz cu un di tres luga den U-16 y medaya di Brons, Mark Bueno cu un di dos luga den U-18 y medaya di Plata y WCM Annelaine Jacobs cu un di prome luga den U-20 y medaya di Oro. Awor aki Thamara Sagastegui y Brian Diaz un bes mas lo forma parti di e delegacion.
Stichting Sportsubsidie Aruba ta subsidia e biahe di e parti di e delegacion di ahedrez cu lo competi den e campeonato di Carifta Junior Chess Championship na Surnam.
Cumprando weganan di Lotto, e Loteria di Aruba manera Catochi, 1-Off, Big 4, Zodiac, Wega di Number Korsou, Lotto di Dia, Lotto 5, Mini Mega cu su Mega Plus y e diferente weganan di Raspa Y Gana bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.