CARACAS, Venezuela- E dictador a haci e anuncio a trabes di su cuenta di Twitter. E nombracion di Delcy Rodiguez ta hala e polemico Tareck el Aissami un banda. El Aissami ta wordo acusa di narcotrafico y conexion cu terorismo.
E hefe di estado di Venezuela, Nicolas Maduro, diahuebs a nombra e presidente di e Asamblea Nacional Constituyente (ANC) oficialista, Delcy Rodríguez, como vicepresidenta ehecutivo di su Gobierno.
“Mi a designa como vicepresidente ehecutivo un muhe hoben, balente, yiu di martir, revolucionario y cu a pasa door di mil bataya: nos ruman, Delcy Eloina Rodriquez”.
Rodriguez tabata canciyer y minister durante e administracion di Maduro y lo reemplaza Tareck el Aissami cu awo, lo pasa pa ocupa e vicepresidencia economico. Ademas, e lo ta hefe di e cartera recien crea Industrias y Producción Nacional.
E lider te cu awo di ANC, un superpoder integra solamente pa oficialistanan y no reconoci pa diferente gobierno, a reitera cu na Venezuela no ta existi crisis humanitario y cu mescos cu Maduro, ta culpa empresarionan, opositornan y gobiernonan stranhero di e diferente problemanan cu e pais ta pasando aden.
E hefe di estado Venezolano, diamars a anuncia cu e lo haci un “renobacion parcial”di su gobierno den “puestonan clave” di economia y di servicionan publico.
Sin embargo, e anuncionan aki no ta trece niun cara nobo, ya cu tanto Rodríguez como el Aissami tabata forma parti di gobierno di Maduro, como tambe hefe di e cartera di adminsitracion di e fayecido Hugo Chavez (1999-2013).