Departamento di Cultura Aruba (DCA), Comision Celebracion Dianan Nacional bou auspicio di Ministerio di Cultura ta preparando un charla riba e celebracion San Juan, Dera Gai cu lo ser duna pa Sr. Jubi Naar riba diahuebs 15 di Juni 2017 pa 7’or di anochi na Plaza Betico Croes riba Vondellaan. E charla ta pa publico en general y entrada ta gratis.
Recientemente DCA, CCDN, Serlimar NV y KPA a reuni cu representantenan di organisacion y Centro di Barionan tocante e actividadnan di den bario di nos Celebracion di San Juan di tur aña riba 24 di Juni.
A papia di e forma con por yuda di manera facilitario cu baricada y tent, e asunto di permiso general di evento, contribucion y por duna guia na dicho actividad na e persona cu ta guia e evento pa publico.
Tur esnan presente a keda contento cu e reunion y tur informacion cu a ser duna.
Un formulario a ser duna na representantenan cu nan mester yena riba nan necesidadnan y dicho formulario mester ser entrega prome cu dia 16 di Juni venidero na DCA.
Ta ser pidi na e organisadornan pa manda nan informacion di actividad via e-mail na [email protected] pa e calendario di actividad por keda publica na tempo.
DCA y CCDN bou auspicio di Ministerio di Cultura ta invita henter e pueblo di Aruba pa asisti na e charla riba diahuebs 15 di Juni pa 7’or di anochi na Plaza Betico Croes, riba Vondellaan.
Ban hunto celebra e tradicion di Fiesta di San Juan, Dera Gai den nos barionan riba 24 di Juni di aña aki. Pa nos tradicion keda bibo pa generacion cu ta celebr’e y pa generacion di nos hubentud cu ta sigui… Biba San Juan!