E rioolnan den Oranjestad hopi biaha durante mal tempo ta keda pega y ta haci cu e acumulacion di awa ta bira hopi cu cierto partinan ta yena cu awa, strobando asina e pasada di auto. Un ehempel asina ta Weststraat, y demas cayanan cu tin cerca di lama. Bureau City Inspector, ya durante weekend y tambe riba dialuna, tabata basta ocupa, hunto cu personal di DOW, caminda cu nan a para haci nan control di tur riool y tambe manholenan. Segun Danilo Prescott di Bureau City Inspector, a bin ripara cu tin hopi sushi pega. Esaki a haci cu City Inspector y DOW mester a habri tur manholenan, haci limpi y zorg pa e awa por sigui flow pa coy su caminda pa lama.
Constantemente ta bisa cu na momentonan manera esaki, e rioleringnan ta keda pega y awa ta subi, diripiente hende ta bisa cu DOW of Bureau City inspector no ta cumpli cu trabao. Pero atrobe, si pueblo mes por yuda, ta con nan kier pa esakinan ta limpi. Berdad lama a subi, pero hunto cu sushedad pega den riool, esaki ta haci cu tur esaki ta subi. A tene control den Venezuelastraat, si mira e hanchi pabao di e Santana, ta yena cu sushi, resto di mata cu a corta, tira patras di santana. Ora cu e awa bay subi, Serlmar, Bureau City Inspector y DOW ta haya hopi trabao pa haci limpi pa asina laga e awa sigui pa lama.
Kico ta costa subi bo auto, bay dump, benta sushi afo. Pero tin hende ta hacie na e manera mas facil. Ora cu awa yena, esakinan ta e consecuencianan.
Segun Prescott, awor aki sa con pa actua den situacionnan asina aki. Otro biaha lo bay haci’e mas preventief. Lo bay percura pa controla tur cos prome, pero no ta kita cu pueblo mester mantene nan luga y nos isla limpi, Prescott a splica por ultimo.