Como politico bo mester bisa loke bo ta bai haci y haci loke bo ta bisa. Mi a anuncia algun luna atras cu lo haci cambionan den e kiesverordening y asina presenta un ley di iniciativa cu e cambionan aki y awor esaki a keda cla y ta wordo entrega na presidente di Parlamento.
Pa decadanan largo e kiesverordening no a wordo cambia y adapta y a yega e momento prome cu eleccion 2017 pa esaki wordo cambia. Como politico nos mester duna oido na deseo di pueblo y e pueblo ta anhela cambionan di e kiesverordening. Na e momentonan aki un representante di pueblo ta wordo scogi por medio di voorkeurstemmen of por medio di su number riba lista politico. E ley aki no ta uno husto y tampoco ta refleha deseo di pueblo den e cas di pueblo. Tin hopi politico ta haya confiansa y sosten di pueblo pero finalmente no ta drenta Parlamento pa motibo di e ley y e sistema cu nunca a wordo cambia. Den e constelacion actual di Parlamento tin parlamentarionan cu a haya 47 voto y den e mesun partido tin otro cu a figura mas patras riba e lista y a logra haya 427 voto cu ta casi 10 biaha mas hopi voto cu esun cu a drenta Parlamento. E no ta husto y tampoco representativo pa deseo di e pueblo aki. Un miembro di Parlamento di Aruba mester ta un persona cu ta representa e deseo di pueblo durante eleccion.
E cambio di e kiesverordening ta algo cu mester wordo haci pa e por ta representativo pa deseo di pueblo. Mi no ta kere cu por tin un politico of un miembro di Parlamento cu por ta CONTRA deseo di pueblo y CONTRA e cambionan aki. Pa e ultimo 3 lunanan aki a traha riba e concepto di ley aki y finalmente, manera anuncia esaki a keda cla. Si haya aprobacion di mayoria di sala cual mi ta convenci cu mi lo haya, un miembro di parlamento lo wordo scogi basa riba e CANTIDAD di VOTO cu e ricibi durante eleccion venidero y no a base di numeracion/secuencia mas manera ta e caso actualmente.
E politico of partido politico cu ta contra e cambionan aki no merece confiansa di pueblo pasobra nan no kier cambia e sistema y kier mantene e kiesverordening anticua aki y tin miedo pa mehora e sistema. E lider politico cu no kier sostene e cambionan aki tin miedo di perde e poder cu e tin como lider di partido.
E cambionan aki mester bin na vigor promer cu eleccion 2017 y mi ta spera cu e reunion publico aki wordo yama mas pronto cu ta posibel pa trata e cambionan aki pa yega na un votacion pa pueblo por husga kende ta para pa cambio, kende ta para pa progreso, kende ta para pa mehoracion di democracia y kendenan ta keda mara na e manera tradicional y anticua!