Na prome luga mi kier a gradici henter e pueblo di Aruba ta e sosten brinda na nos partido MEP durante eleccion di dia 22 september y sigur na mi persona. E sosten duna na nos partido tawata grandi y sigur ta algo di aprecia.
Mi ta sinti sumamente contento, satisfecho y agradecido na cada un di mi 2399 votadonan cu a deposita nan confianza den mi persona. Cu tur humildad mi kier gradici nan di mas profundo di mi curason. Mi kier a gradici henter di D TEAM cu a yudami durante 4 aña largo. Un team di boluntarionan di berdad cu a traha incansablemente cu hopi energia pa nos logra e cambio.
E sosten ricibi durante eleccion dia 22 September ta un estimulo grandi pa sigui traha mas duro pa progreso y bienestar di e pueblo aki.
Nos a hiba un campaña limpi y nos a hiba un campaña di cambio. Pueblo a sa di acepta nos mensahe y esaki a keda demostra den e votonan. Ta obvio cu e resultado di dia 22 di September a manda un señal cla y raspa pa partido AVP. E mensahe ta cu pueblo a rechasa corupcion y pueblo a rechasa gobernante iresponsabel cu no a traha pa pueblo sino pa un grupito. Partido AVP a haya e derota mas grandi den nan historia perdiendo mas cu 11.000 votado.
Nos pueblo a pidi cambio y pueblo a logra e cambio. Partido MEP a conoce un crecemento di mas cu 25% y pueblo a scoge pa un cambio di direccion.
Nos tarea no lo ta facil y tin retonan hopi grandi cu mester wordo soluciona. Nos ta cla pa asumi nos responsabilidad y nos ta cla pa atende cu tur e problemanan cu pais Aruba tin na e miho manera posibel. Nos tin un tremendo ekipo y nos kier traha pa progreso y bienestar di cada ciudadano.
Nos sigur lo bin cu cambionan progresivo caminda pueblo lo sinti y nota e diferencia den gobernacion. Nos lo hiba un gobernacion transparente caminda tur hende ta conta y participa.
E cambio sigur lo wordo sinti y pueblo lo sa di nota esaki. En todo caso importante awor ta cu tin un biento fresco ta supla riba e pais aki caminda pueblo lo conoce personanan cu un integridad halto pa goberna e pais aki!