Ta obvio cu nos pais a wordo distrui pa un Gobierno cu a usa e poder di pueblo pa haci y deshaci. Esaki tabata palabranan di ex minister Otmar Oduber na momento cu el a entrega su retiro. Otmar Oduber tabata e siguiente miembro di AVP cu mester a entrega su retiro pa motibo cu e no ta di acuerdo mas cu AVP aunke e mes a forma parti di desaster aki pa e ultimo 7 añanan aki. Un prome minister cu NO tin ningun control mas riba su Gobierno y mucho menos riba maneho di nos pais. Den apenas 2 aña di tempo Juan David Irausquin a entrega su retiro, Marisol Lopez Trompa entrega su retiro, Alfonso Boekhoudt a wordo kita for di trabou y awor a toca turno na Otmar Oduber. Mike Eman ta carece liderasgo y ta hopi debil. E no tabata tin e capacidad pa wanta un Gobierno hunto. E no tabata por a sincronisa un maneho dirigi riba progreso di nos pais. Nos tin cu puntra nos mes si un persona NO por wanta ni su propio hendenan y Gobierno hunto ta con e kier bay cerca pueblo pa bolbe pidi pueblo mandato. E mester tin berguensa y no solamente Otmar Oduber mester a entrega su retiro sino henter e gobierno aki. E Gobierno aki a destrui nos pais, nos pais NO a progresa e ultimo añanan aki, nos pais ta den pleno deterorio y sin un lider para den su sapato. Nos pais no merece un lider cu ta somete su mes na un welga di hamber enbes di atende cu e problemanan. Nos pais no mester un prome minister cu ta entrega nos autonomia y no tin ningun control riba maneho di nos pais. Nos pais no merece un prome minister cu ta aproba tur e corupcionan cu tin den e gobierno aki. Famianan ta haya 90.000 M2 pa bende, pa haci negoshi cu nan y ta bira miyonario riba custia di pueblo y tur esaki cu aporbacion di promer minister. Parlamentarionan ta bende y horta tereno di pueblo y prome minister keto. Permisonan ta wordo bendi diaramente y prome minister NO TA ACTUA. Esaki ta e tristo realidad di nos pais y pesey nos pais ta den un decadencia. Nos tin un prome minister cu NO kier actua y no kier pa nos pais progresa. E kier e progreso pa un grupo di hende rond di dje lubidando riba e pueblo mes.
No pais ta den pleno crisis y e prome minister ta ausente. Imaginabo un pais caminda nos enseñanza ta wordo poni na ultimo luga. Pius X school na Dakota e muchanan mester a haya les pafor bao di palo pasobra no tin airco y e fan nan ta daña y Gobierno no tin placa pa drecha nan. E situacion aki ta inaceptabel pasobra no por ta asina cu 700 miyon florin disponibel pa Green Corridor y Watty Vos Boulevard. Anto n’e muchanan aki cu ta nos futuro di mañan mester haya les den circumstancianan aki. Nos pais ta parce derde wereld land.
Simplemtente bo no ta reconoce bp pais mas. No solamente tin un crisis financiero, economico, social y laboral sino tin caos tur caminda. Si den Gobierno mes e situacion ta manera cu e ta, ta con e lo ta pafor. E mensahe cu nos kier manda pa pueblo ta, AVP mester bay y NO MAG BOLBE! Un gobernacion asina malo nunca mas mag di ripiti!