E aña aki ta un aña record pa loke ta trata atraconan arma. Te na e momentonan aki a registra 53 atraco y cada bes e situacion ta birando pio riba e pais aki. Banda di esaki tin 8 asesinato caba registra y e dos indicadornan aki ta duna di conoce con for di control e situacion actual na Aruba ta. Na momento cu nos cuerpo policial no tin placa pa cumpra bulletproof vest y ta minister di turismo mester cumpra esaki pa nan ta bisa nos hopi. Tin demasiado arma di candela den circulacion y tur atraco cu ta wordo cometi tin armanan di candela cu ta wordo usa. E ultimo 4 añanan NO tabata tin opleiding pa polisnan nobo, ta conoci caba cu NO tin helicopter, no tin Warda nos Costa y no tin material suficiente pa polisnan por haci nan trabou. Nos ta nota cu e pueblo ta bibando den tension, ta bibando den panico cu miedo cu nan ta wordo sea horta of atraca den nan mesun hogar. Criminalidad ta afectando nos comunidad grandemente y den tur skina e ta wordo sinti. Gobierno ta neglishando e siguridad di nos pueblo y esaki ta motibonan di preocupacion serio. Nos tin un prome minister cu ta prefera di organiza Green Conference cu pone placa disponibel pa nos pueblo sinti su mes sigur. E situacion actual na Aruba ta un situacion cu a wordo crea pa Gabinete Mike Eman 1 y 2. Nan a crea un pobresa nunca antes bisto y e problemanan social ta grandisimo. E desempleo bao di nos hobennan a surpasa 30% y no tin ningun perspectiva pa nan.
Simplemente nos NO por keda biba bao di e insiguridad aki cu nos ta bibando. Nos pueblo merece di biba den trankilidad, nos merece di biba den un sociedad caminda nos por sali for di cas despues di 6’or di atardi. Nos kier biba den un pais caminda no tin miedo pa sali for do cas, no tin miedo pa bay saca placa anochi, pa bay yena gasolin anochi of bay mini market anochi. Awor aki ola di criminalidad a yega den tur bario na Aruba. Casi tur bario na Aruba tin vigilancia civil caba. Famianan mester a inverti den camera di siguridad, busca cacho, instala alarma pasobra e insiguridad cerca tur hende ta grandi. Nos no por keda acepta cu minister di husticia ta keda tapa wowo pa e realidad y keda bisa no tin placa pa combati criminalidad. Nos no por acepta cu nos ta keda wordo manipula cu Aruba ta sigur siendo tur dia tin atraco, ladronicia y joyriding. E situacion ta uno serio y accion mester wordo tuma awo!!