E ultimo 3 añanan aki mi a siña hopi di Parlamento di Aruba y a nota tambe hopi deficicencia den e manera cu esaki ta funciona. Loke tambe bo ta nota ta e hecho cu un miembro di Parlamento ta un representante di pueblo pero den practica tin miembronan cu apenas ta representa un grupo hopi chikito den e comunidad aki. Mi ta kere cu despues di hopi aña den e mesun sistema a yega momento pa nos trece cambio den esaki. Di momento cu mi a drenta politica mi semper a kere den un democracia caminda e pueblo ta esun representa den Parlamento y pesey mi ta kere tambe cu e politiconan cu mas voto ta esnan cu mester representa pueblo den Parlamento. Na e momentonan aki ta a base di numeracion riba lista, a base di secuencia di number bo ta wordo scogi pa drenta Parlamento di Aruba si e partido saca asiento. Den practica bo ta nota cu awor aki tin miembronan di Parlamento cu apenas 47 voto y ta representa ‘’pueblo’’ y vota den nomber di pueblo eyden. Mi ta kere cu esaki NO ta e miho manera y tampoco ta ehempel di un democracia bibo. Un democracia bibo ta caminda esnan cu mas voto ta haya representacion den Parlamento di Aruba.
Nos pueblo su voz mester wordo representa conforme na deseo y ta pesey cada 4 aña nos bay urna electoral pa scoge nos gobierno y nos Parlamento. Mi ta kere mester tin boluntad politico na Aruba pa haci e cambionan aki cu den mi opinion ta necesario y ta sigur algo ta biba den curason di hopi aki na Aruba.
Nos mester por cambia e structura aki cu hopi a desea di cambia y a yega e momento di berdad pa haci e cambionan aki cu ta necesario y ta na beneficio di democracia.