Dentro di algun dia Parlamento di Aruba lo bay trata presupuesto 2017. Un biaha a keda demostra cu e gobierno aki NO tin e boluntad di reduci nan gastonan pasobra un biaha mas a bolbe aumenta e gastonan di presupuesto 2017. E gastonan di e presupuesto aki a aumenta cu 53 miyon florin. Den 8 aña AVP a distrui nos pais, a kibra nos finansas publico, a crea debe, a crea problemanan social y a crea pobresa. E placa pa e trahado humilde simplemente no ta yega. Ta tur dia mi ta topa ciudadanonan cu ta bisami cu nan mester traha 2 trabou pasobra e placa NO ta yega. E hende NO a progresa e ultimo 8 añanan aki. Esnan cu si a conoce progreso ta e coordinadornan, esnan cu a haya tereno pa bende, esnan cu a bende permiso, parlamentarionan di AVP cu a haya casnan den Colony, parlamentarionan di AVP cu ta horta y bende tereno di pueblo pa asina yena nan saco, parlamentarionan di AVP cu ta cobra pensioen di AOV, APFA y salario di parlamentario y esnan cu a corumpi e pais aki. E pais aki ta insigur, no a conoce progreso y ta mas bien den decadencia. No tin crecemento economico y pueblo ta bashi, sin placa pa por hiba un bida digno.
Ta tristo pa mira con iresponsabel Mike Eman ta como prome minister. E ta aproba derocha di placa di pueblo y mes ta e complice prinicipal di esaki. Gastonan di coordinador nunca antes tabata asina halto manera e ultimo 8 añanan aki. Den 2 periodo di gobernacion Mike Eman e gastonan di coordinador a yega 260 miyon florin. Cu 260 miyon florin por a construi scol, por a inverti esaki den enseñansa, por a inverti esaki den complehonan deportivo, por a haci un cantidad di otro cos cu e placa aki. Ta un abuso cu ta wordo cometi pa e Gobierno aki pa mantene e gastonan di coordinador asina halto. Por ehempel Mike Eman so tin 113 hende riba payroll y su payroll pa e ultimo 8 añanan aki tabata 80 miyon florin. Cua compania den sector priva cu mas cu 100 empleado tin un payroll di 10 miyon florin pa aña. Un hende sin gevoel so por gasta placa di pueblo na e manera aki pasobra mi ta sigur si ta trata Eman su negoshi priva nunca e lo a pone asina hopi hende riba payroll. Door cu no ta trata su placa e ta gasta con cu e kier sin pensa riba e consecuencianan pa nos futuro y sin pensa riba necesidad y prioridadnan di pais. No tin responsabilidad, no tin sentido comun.
Un gobierno serio y responsabel nunca lo a gasta asina hopi placa na e post di coordinadornan. Common sense y logica ta bisabo cu Mike Eman ta abusando. E modelo aki ta un modelo di dictadura moderno caminda ta usa fondonan publico pa mantene e votonan pa asina por keda goberna. Nos pais mester un gobierno cu NO ta pensa riba e siguente eleccion sino riba e siguiente generacion. E gobierno actual su unico meta ta con pa gaña, malinforma pueblo pa asina nan por keda den gobierno.
Nunca Mike Eman a pensa riba futuro di nos yiunan, nunca el a pensa riba mayan. Su unico meta ta pa manipula y haci uso di placa di pueblo pa tene esnan rond di dje contento lubidando riba e pueblo.
Un cos ta sigur, e pueblo aki lo sa di husga e Gobierno aki y e mensahe lo wordo manda pa AVP cu ta basta cu AVP!