WILLEMSTAD – Kòrsou a ekstraditá awe, djamars 22 di novèmber 2016, e dama A.d.R-J (22 desèmber 1972, Repúblika Dominikana) pa Estádos Unídos. E dama a keda entregá awe mainta na airopuerto Hato dor di miembronan di Divishon Kriminalidat Organisá di KPC na funshonarionan di e kuerpo di hustisia di Merka, esta US Marshals. Bou di kustodia di e funshonarionan Merikano el a biaha den un avion spesial pa siudat di Boston, Massachusetts.
Departamento di Estado di Estádos Unídos (US Department of State) a hasi e petishon pa ekstradishon fia 4 di febrüari 2016. Korte Komun di Hustisia a haña ekstradishon di A. D. R-J akseptabel den su desishon di 15 di mart 2016. E persona en kuestion a apelá e desishon den kasashon na Den Haag. Dia 20 di sèptèmber 2016 Hoge Raad a deklará e petishon sinembargo ‘niet-ontvankelijk’. Ku esaki e desishon di Korte Komun di Hustisia di 15 di mart 2016 pa Gobernador a bira irevokabel. Gobernador di korsou a disidí 25 di òktober 2016 pa ekstraditá e dama na e pais ku a hasi e petishon, esta Estádos Unídos.
E dama A.d.R-J ta ser sospechá dor di Fiskal Merikano di konspirashon pa transportá i distribuí kantidat grandi di kokaina pa Merka. Durante un entrada hudisial na e dama su kas na Kòrsou na desèmber 2015 a bin haña alrededor di 12 kilo di kokaina. Tambe polis a konfiská arma i material i mashin pa produsí bolita. Na luna di desèmber 2015 A.d.R-J , huntu ku ko-outor R.A., a keda detené na Kòrsou a base di un petishon di detenshon emití pa US District Court for the District of Massachusetts. E petishon pa detenshon a keda entrega a base di un petishon di ekstradishon ku tabata pendiente pa ser entregá.