Dia 19 april pa mas o menos 10 or y 15, central di polis ta dirigi un patruya pa Eagle Beach na altura di “Paradise Beach Villas”.
Segun Central di Polis, ta trata aki di un dama, cu posiblemente lo tin problemanan mental, cu tabata tocando radio di su auto na un volume demasiado halto y tabata balia na un manera indecente. Personal di siguridad di Paradise Beach Villas, nan a purba papia cu e dama door cu e tabata tocando e radio na un volumen halto y esaki tabata forma un molester pa otro bishitantenan. E personal di siguridad a wordo acerca tambe door di turistanan cu tabata keha di e desordo cu e dama tabata ocasiona. Pero nan no tabata por a rasona cu e dama. E guardia di siguridad a mustra polisnan e dama, cu na e momentonan ey tabata canando den direccion Noord. Tambe e guarida a mustra e polisnan ariba e articulonan cu e dama a laga atras ariba beach. Polisnan a pidi e guardia di siguridad pa cuida e articulonan di e dama pa asina nan papia cu e dama aki, De G., pero sin resultado. E dama tabata agresivo. E polisnan a purba na mas di un ocasion pa papia cu e dama en cuestion, sin un resultado positive. E dama a cuminsa insulta e polisnan dilanti di turista. Despues el a core bay direccion zuid, den direccion di su articulonan cu el a laga ariab beach. Aki un biaha mas polisnan a purba papia cun’e y pa calm’e. Akinan un biaha mas, el a cuminsa insulta e polisnan, papia palabra malo den diferente idioma. Door di esaki a detene De G. pa e por calma. Pero mirando su reaccion, su actuacion y su manera di haci, a pone cu polisnan a dicidi di yama ambulance via Central di Polis pa nan bin controla e salud di e dama. Personal di ambulance a declara na e polisnan. Na SEHO, De G. tabata tin e mesun actuacion. Pa e motibo aki, a dicidi di yama PAAZ y e dokter di PAAZ, despues di control a dicidi cu De G. mester keda interna.
Centrale di Polis a wordo poni na altura di esaki. E yabi di e auto di De G. a wordo entrega na subrino di De G. E auto tabata para na entrada di Eagle Beach, cera na yabi, den e parkeerplaats.