Mi ta sumamente orguyoso pa yama Bon Bini na un Serlimar nobo. Un Serlimar y Bureau City Inspector cu su lenguahe ta incluí conceptonan moderno manera ‘circular economy’ y ‘sustainability’…palabranan sinonimo cu waste management responsabel.
Aruba lo conoce un edificio unda comunicacion entre Serlimar y B.C.I. lo ta mas optimal y na unda por ehempel nos como comunidad por drive-thru cu nos auto pa hiba diferente pertenencia cu nos no kier mas pero cu otronan lo por drecha bek y bende…asina birando un centro pa cuminsa conscientisa publico y yudando na reduci e cantidad di sushi ariba nos paraiso.
Por ehempel, lo por deshaci di bo sofa na e facilidad, otro ta busce y dreche manera nobo, pa despues bende, regale, of use pa su mes…asina lagando e materialnan sigui circula y wordo usa den comunidad. Ora e materialnan sigui circula e resultado ta menos sushi; esaki ta un ehempel bibo di Circular Economy unda comunidad ta ‘recycle’ door di ‘re-use’.
E ta un di maneranan pa recycla moderno cu diferente compania y pais cu ta conciente di nos responsabilidad pa cu medio ambiente y maneho di desperdicio ta usando. Door di google of facebook search e frase ‘reuse center’ nos lo por encontra facilidadnan asina den diferente bario te hasta den lobby di hotelnan rond mundo. Mustrando pueblo di Aruba cu e concepto no ta nada peligroso of negativo pa un bario, pero uno positivo cu ta brinda posibilidadnan nobo ariba nos isla.