Desde december 2016, Arubaanse Zwembond a inicia cu un curso pa Instructor di Landamento-B. Un total di 25 cursista a inscribi pa forma parti di esaki, unda 1 anja despues 21 cursista a logra pasa nan examen cu exito. Recientemente durante di un rato ameno, e cursistanan a ricibi nan diploma. Mester bisa cu e curso di landamento-B ta e di nivel mas halto na Aruba paloke ta landamento elemental. Un instructor di cu e diploma aki ta cualifica y autorisa pa duna les di landamento pa tur diploma di Arubaanse Zwembond. E cursistanan a traha duro henter anja y awor nan por disfruta di nan diploma y mas cu claro pasa over nan amplio conocimento na otronan.
No por kedasin menciona un team grandi di persona cu a percura pa henter e proceso rond di e curso aki.Presente na e bunita anochinos a haya representantenan di Arubaanse Zwembond, sra. Marion Kan, sra. Esther Croes y sra. Sandy Leito-Rasmijn. E curso tabata den man di coordinador sr. Patrick Werleman.E cursistanan cu a ricibinan diploma ta: Andrea Kelly, Shanté S. Vrolijk, Amy-Jane Kock, Dionne Leito, Valerie Eman, Luz Stella Rodriguez Aleman, Roy Broekman, Margarita Gonzalez, Jennifer J. Steward, Kenneth R. Peterson, Hilda Kelly, DennicellyCroes, LendlDirksz, Meier Maduro, Joanne de Canha, Diana Raquel Sosa Pulgarin, Yolanda Verbeeke, RudyomarLeysner, Ryan Laclé, Kevin T. Yee y Jill J. Alberts. Mester bisa aserca cu dos cursista esta Margarita Gonzalez y Meier Maduro a logra haya e miho resultado. Cu e diploma obteni, awor Aruba ta conta cu mas instructor capacita den landamento cu por duna les na un nivel mucho mas halto.
Un danki sigur na Lotto, e Loteria di Aruba pa medio di St. Sportsubsidie Aruba a subsidia e curso di landamento Instructor B.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e St. Sportsubsidie Aruba.