JALISCO, Mexico- Ministerio Publico di e estado Mexicano, Jalisco dialuna a informa cu Jesús Daniel Díaz García, Marco Francisco García Ávalos y José Salomón Aceces Gastelum, studiantenan di cinde cu a disparce luna pasa despues di a wordo secuestra den e municipio di Tonala dia 19 di Februari ultimo, a wordo asesina.
Esaki ta e conclusion despues di e practica examen forense riba e restonan humano localisa den un finca di e colonia Rancho de la Cruz, na Tonalá.
Den un conferencia di prensa, autoridadnan a precisa cu e curpanan di e tres hobennan studiante di e Universidad di Medios Audiovisual di Guadalajara a wordo disolve den acido pa miembronan di e crimen organisa, pa no keda niun rastro” di nan.
Según Ministerio Publico, e studiantenan, sin cu nan tabata sa, a drenta den un cas di siguridad di e Cartel Nueva Plaza, grupo rival di e Cartel Jalisco Nueva Generacion.
E hobennan a wordo priva di nan libertad pa suhetonan arma cu a identifica nan mes como agentenan di ministerio Publico. E delincuentenan a hiba e hobennan pa un di dos cas di siguridad, unda nan tabata practica tortura y interogatorio.
Eynan, un di e studiantenan a muri debi na e golpinan cu el a ricibi, pa cual e delincuentenan a dicidi di mata e otro dosnan. Despues a hiba nan cadaver na otro cas, caminda cu a hinca e curpanan den acido pa disolve e restonan mortal. Autoridadanan ta calcula cu un grupo di ocho persona a secuestra, tortura y mata e hobennan. Dos di e responsabelnan ya caba a wordo deteni. Ta trata di Gerardo “N” y Omar “N”. Nan ta den detencion preventivo. E investigacion ainda ta den su curso.
Fuente: https://ievenn.com