Willemstad Curacao: E fenómeno pre-elekshon a surgi den pasado komo un barera intenshonal kontra personanan ku tabata sali for di nan partido i lanta nan propio organisashon polítiko pa bai elekshon.
Nan tabata yama nan “splinterpartijen”. E fenómeno di firma lista den forma abierto na Kranshi tabata e arma mas potente ku den pasado gobièrnunan a uza pa tene e partido nan nobo for di parlamento. Siudadanonan tabatin miedu di bai firma lista pa evitá di eksponé nan mes i nan koló polítiko. Ora korte di hustisia a obligá gobièrnu pa kambia e sistema di firma lista den un estilo di pre-elekshon e aspekto di barera kontra partidonan nobo a keda eksistí. Un di e barera nan a kita e montante di fl. 2.000,00 ku mester depositá pa por partisipá na e elekshon i e kantidat di 870 voto ku kada partido mester akumulá. E kantidat a kita ekivalente na 1% di e kantidat di voto bálido ku a depositá den e elekshon anterior.
Huntu ku esaki ta bin e kantidat limitá di únikamente 6 urna ku a pone disponibel pa henter Kòrsou. Ora tin elekshon e votadó tin 106 urna na su disposishon pa depositá su voto. Kada urna ta keda na un distansia ku e votadó por kana na pia bai vota. Pero pa e pre-elekshon e pueblo tabatin solamente 6 urna ku ta apénas 1% di e total. Por ehèmpel pa henter e aria di Banda Bou tabatin solamente un urna te na Tera Kòrá. Otro barera tabata e lista di sosten ku no tabatin un potrèt di e lidernan polítiko riba dje. Esaki tabata funesto pa por ehèmpel esnan ku no por lesa bon òf ku no por lesa‘at all’. Loke tambe a hasi falta tabata un kampaña di informashon debido di parti di Konseho Supremo Elektoral.
Kousa Promé ta desaprobá e sistema di pre-elekshon akí kompletamente, pasobra e ta kontra demokrasia. E ta limitá e derecho pasivo di voto ku tur siudadano tin komo un di su derechinan fundamental humano. Ainda e aspekto di eksponé bo mes ta keda vigente ya ku esun ku bai vota den e pre-elekshon ta demostrá obligatoriamente simpatia pa un di e partidonan nobo. Kousa Promé ta kontra e sistema di pre-elekshon i lo boga den un gobièrnu nobo pa un partisipashon liber, demokrátiko a base di igualdat total. Tur partido ku ta partisipá mester tin igual oportunidat pa hasi uzo di nan derechi pasivo sin diskrepansia.
No por ta akseptabel ku un grupo di partido pasobra nan ta partidonan nobo tin ku traspasá un barera pa por hasi uzo di e derechi di voto. Kousa Promé ta para pa elekshon liber a base di igualdat i a base di demokrasia. Kousa Promé ta para pa un reforma total di nos sistema di elekshon, kaminda pre-elekshon ta disparsé kompletamente for di e sistema di elekshon.
Cortesia di Loopabc.com