Curacao: Noticianan Policial, detencion, secuestro y control

0

Aki ta sigui algun comunicado di prensa di parti di Cuerpo Policial Curacao relaciona cu algun asistencia.

Detenshon di dos sospechoso.

Kontinuando ku e investigashon relashoná ku e ladronisia na Diamantweg dia 17 di òktober 2017 (komunikado di prensa 429/2017) polis a hasi dos detenshon.
Djarason 18 di òktober 2017 alrededor di 10.44 or, despues di a rondoná un kas na Kaya Nubia polis a detené e hombernan:
 G.C.M. di 21 aña di edat;
 K.M.B. di 22 aña di edat, ámbos nasé na Kòrsou, komo sospechoso di e kaso ariba menshoná. Durante investigashon den e kas na Kaya Nubia polis a haña i konfiská:
 Un kashi di un arma di kandela;
 Un rifel;
 Tres saku ku simia di mariwana;
 Mata di mariwana;
 Un karson kòrtiku manchá na sanger, ku ta kuadra ku e paña ku e sospechoso tabatin bistí ayera na momentu di e intento di ladronisia.
Durante detenshon di e sospechoso K.M.B. e agentenan a nota ku e tabatin un herida di bala na su atras.
E sospechosonan aki den oranan di awe mainta tabata lòs bala den laira den e área di seru Fortuna.
A presentá e sospechosonan dilanti un fiskal ouksiliar ku a ordená nan enkarselamentu pendiente di mas investigashon.

————————————————————————

Kaso di sekuestro ku maltrato.

Djámars 17 di òktober 2017, alrededor di 20.22 or, Sentral di Polis a haña notifikashon ku un hòmber a sekuestrá su kasá riba Sta Rosaweg i hinké den baul di outo bai kuné.
Mesora Sentral di Polis a dirigí un unidat polisial na e sitio.
Kontinuando ku e investigashon e patruya di manteshon di òrden públiko a bai na kas di e sospechoso. Na e momentu ku e patruya tabata einan e vìktima (dama) a sali kore for di e kas i pidi ousilio.
Polis a konstatá ku e dama tabata tin varios herida na su garganta i bou di su pechu robes. Despues a resulta ku ta trata di hinkanan ku e sospechoso a propine ku skrufdrai.
Ambulans ku a presentá na e sitio a transportá e dama vìktima pa SEHOS pa tratamentu médiko.
Detenshon di e sospechoso:
Djaráson 18 òktober 2017 alrededor di 00.27 or di marduga polis a detené e sospechoso U.G.L.B. nasé na Kòrsou di 32 aña di edat riba e krusada Kaminda George Willems/ Kaya Ancelmus Boy Dap sospechá di sekuestro i maltrato ku arma.
A presentá e sospechoso dilanti un Fiskal Ouksiliar ku a ordená su enkarselamentu pendiente di mas investigashon.

————————————————————————

Kontròl di tráfiko, violashon di e Lei di Arma i e Lei di Opio.

Djamars 17 di òktober 2017, ‘Hato Politie’ (ku ta konsistí di personal di Korps politie Curaçao i Koninklijke Marechaussee) konhuntamente ku ‘Airport Police’ e unidat di ‘Curaçao Airport Partners’ i personal di Duana a tene kontròlnan respektivamente di; tráfiko, violashon di e Lei di Arma i e Lei di Opio, den área di aeropuerto (Hato). E kontròlnan aki a tuma lugá entre 13.45 or pa 14.45 or.
A kontrolá tantu vehíkulo komo persona. Un total di 76 vehíkulo a keda kontrolá i a partí un total di 9 prosèsverbal pa e siguiente infrakshonnan e.o. manehá un vehíkulo; sin reibeweis bálido, sin seguro bálido, sin karchi di kùr/kaduká, sin number pagá i sin faha di seguridat bistí.
E kontròlnan aki ta kontinuá.

————————————————————————

Kontròl di tráfiko.

Djaluna 16 di òktober 2017, Departamentu di tráfiko (VT&T) a tene kontròl di tráfiko den Kaya San Juan. E kontròl aki a tuma lugá entre 17.00 or pa 18.30 or.
Un total di 52 vehíkulo a keda kontrolá i a partí un total di 13 prosèsverbal pa e siguiente infrakshonnan e.o. manehá un vehíkulo; sin seguro bálido, sin number pagá, ku karchi di kúr kaduká, ku glas skur i sin plachi di number.
Durante di kontròl polis a kita dos outo pa manehá sin papel di e vehikulo. E kontròlnan aki ta kontinuá.