WILLEMSTAD – Lo no bay tin Curaçao North Sea Jazz Festival den 2017. Cu dolor den nan curason Fundashon Bon Intenshon y Mojo Concerts a dicidi pa cancela e evento e aña aki. Den un intento di nobo pa pone un bon programa den otro, caminda no a spar ni esfuerzo ni cen, no a logra pa haya artistanan grandi pa e weekend di e edicion di 2017.
Fin di aña pasa pa mesun motivo FBI y Mojo a cancela festival di 2017. Djis despues a dicidi den cooperacion cu algun stakeholder local, pa hasi un intento pa toch pa organiza e festival e aña aki. E organisacion a hasi todo por todo pa logra nan meta, pero sin e resultado desea.
Considerando e interesnan tanto priva como publico, Fundashon Bon Intencion ta aspira un vision consistente y riba termino largo na nivel internacional top. Den e cuadro aki ta inevitable, cu ta opta pa cancela e festival ora bo no por haña artista grandi (main act). Mester mantene e bon nomber y imagen di e festival tanto local como internacionalmente.
Despues di a evalua tur posibilidad y considerando e aporte di placa di comunidad, no a keda e organisacion otro decision di pas e aña y dirigi tur atencion riba e edicion di 2018.