Cu un gran trayectoria den e mundo periodistico y radial, sr. Victor “Toko” Winklaar a tuma un reto nobo den su carera periodistico. G-FM Den Noticia ta e nomber di e reto nobo den e mundo di periodismo radial, cu sr. Winklaar a tuma.
Hunto cu e no desconoci Alexa Werleman, Toko Winklaar lo cuminsa presenta G-FM Den Noticia diamars awor pa 12’or di merdia y te cu 1’or di atardi, na G-FM 99.9.
Presentando noticianan imparcial y obhetivo, G-FM Den Noticia lo ta un noticiero dinamico cu lo trece e informacionnan di mas relevante tanto local como internacional.
Den un ceremonia intimo na studionan di G-FM 99.9, sr. Simon Arends y sr. Toko Winklaar a oficialisa e relacion nobo aki, den presencia di demas colega di Radio Galactica.
Memorablemente e acuerdo aki a keda firma riba e fecha di e di 25 aniversario di e programa legendario Oldies.
Station Manager di G-FM 99.9, sr. Maikel Oduber, a duna e bon bini oficial na sr. Toko Winklaar expresando na mes momento su satisfaccion pa mira cu Toko a scoge pa uni su mes na e famia Galactica..
Gerencia y coleganan di G-FM 99.9 ta duna sr. Toko Winklaar un caluroso bon bini na e gran famia Galactica!