Diabierna anochi te cu diasabra den oranan di marduga Cuerpo Policial a tene un control grandi den trafico hunto cu Departamento di Transporte Publico. E control aki a tuma luga riba L.G smith blvd dilanti di APA, a para mas cu 200 auto te asta taxi y autobus. Durante e control aki a controla si e vehiculo nan documento ta na ordo y si chauffeur ta core cu rijbewijs. A topa cu varios chauffeur ta core auto sin rijbewijs y esei ta costabo un multa.
Auto sin seguro a keda tuma den beslag hiba warda. Un hyundai accent a keda controla y polis a bin haya droga den esaki unda e cacho di K9 Unit di Cuerpo Policial a haya hole di esaki y autoridad a canta bingo. Varios chauffeur burachi a keda para e anochi aki y a keda deteni hiba warda den van di CEA. E control a sigui riba L.G Smith Blvd cu Adriaan Lacle blvd unda a topa cu vehiculonan sin documento y asta taxista bou influencia di alcohol caminda DTP tabata na e sitio pa controla tur cos.