Cuerpo Policial mester di un Alto Comisario y no ‘Team di Maneho’

0

Cuerpo Policial Aruba ta e unico instituto na nos pais cu tin como su encargo nos siguridad, cu ta autorisa pa ley pa uza man duro ora mester pa mantene ordo na nos pais. Como un ex Polis, mi por bisa cu siguransa cu e ta un instituto cu nos por ta orguyoso di dje. Tin hopi homber y muhe cu ta traha duro tur dia pa nos ta un isla cu un nivel halto di siguridad. Mescos cu e ta un instituto cu ta brinda cuido na nos tur, e mes ta un instituto cu na su turno tambe mester wordo cuida.

Gobierno mester provee claridad di maneho, instrumentonan material y legal pa e Cuerpo por funciona bon hunto cu tur e condicionnan secundario necesario pa e Cuerpo por brinda nos e siguridad cu pa nos isla chikito ta asina importante. Si Gobierno faya den brinda loke e Cuerpo mester pa funciona optimalmente, esaki lo afecta e Cuerpo directamente y na su turno, esaki lo afecta e nivel di servicio cu nos ta custumbra di nos Cuerpo Policial. Nos tabatin e dicho cu “Polis ta labora pa pueblo por descansa”, pero e labor aki ta mara na condicionnan, cu na mi opinion ta cuminsa core peliger bou di e maneho actual.

Mi a tuma nota di e plan di Minister di Husticia, Andin Bikker, pa bini cu un team di maneho interino despues cu e Hefe actual asumi un responsabilidad nobo na un departamento nobo. Te ainda nan no por duna mucho detaye di con e maneho interino lo ta forma. Mi ta compronde cu e Minister nobo ta haya e reto aki su dilanti, pero como gobernante esey ta e yamada cu ta wordo haci riba bo tur dia, esta pa maneha, duna guia y claridad, bini cu vision y implementa esey exitosamente. Loke ta importante ta cu e Minister nobo ta laga su mes wordo conseha door di hendenan cu conocemento di e materia y cu no tin nan propio agenda, pero tin e bienestar di nos pais y di nos siguridad como nan unico prioridad.

Papiando cu mi coleganan, mi por mira mas y mas cu e situacion aki ta un preocupacion grandi den Cuerpo Policial y tin hopi falta di claridad. Esaki ta crea des animo y mester evita tur e desaroyonan negativo aki mas lihe posibel. Tin hopi speculacion den Cuerpo di Polis y hopi hende ta menciona nombernan di hende cu por bira hefe di Cuerpo Policial, sin tene cuenta kico esaki ta haciendo cu e organisacion. No lubida cu un well oiled machine ta keda algo delicado cu tur su piesanan cu nan tarea specifico trahando hunto den balansa perfecto, y ora e mashin aki tin bo propio siguridad den su man, mester respeta y cuida e mashin aki riba tur cos. Si bo daña esaki, ta dificil pa drecha esaki bek rapidamente. Een gewaarschuwd man telt voor twee. “Di experencia mi por bisa cu un team di maneho den un organisacion policial no ta bon pa e organisacion. Cuerpo policial mester di un Korpschef cu t’ey pa su organisacion den bon y den malo. Un Korpschef cu ta lanta para dilanti di su organisacion y duna guia na e organisacion. Un team interino lo no por realisa esaki, pero lo crea un situacion bruha den e top di nos cuerpo”, asina Robert Candelaria a duna di conoce.

Mas leu e Parlamentario a indica cu “Nos por mira cu hasta mi ex colega den Polis y actual miembro di coalicion den Parlamento a haci un yamada na Minister pa no introduci e maneho interino aki. Riba e asunto aki, nos como ex colega ta riba un liña. Mi ta spera cu Minister duna oido na esaki. No mester crea un situacion den top di Cuerpo Policial na unda un persona por scoge ken lo duna e miho contesta pe. No mester crea un situacion na unda e top di Cuerpo di Polis tin mas cu un cara. Mester tin un bos, un cara y un liña di maneho paden y pafo di e organisacion. E Korpschef mester di un team di maneho bou di dje pa ehecuta su liña di maneho y no un of mas hende banda di dje y na mes nivel cun’e. Un organisacion herarkico mester di integridad, claridad, stabilidad y direccion di ariba cu mester baha te den profundidad di e organisacion”, di acuerdo cu Parlamentario Candelaria.

E ta convenci cu politica no mag forma parti di nos Cuerpo policial. Mester respeta Cuerpo y mantene liber di politica y caminda esaki a logra infiltra caba, mester eradica esaki di e organisacion. Esaki ta conta pa tur parti di e Cuerpo di Polis, incluso e Sindicato di Polis!

“Pa clausura mi no por keda sin para keto y bisa algo di nos Hefe di Polis, esta mr. Adolfo (Dolfi) Richardson. El a tuma Cuerpo Policial over y a logra cambionan significativo den su tempo como hefe di e organisacion, lagando un bunita legacy atras. Den su tempo como Korpschef, el a haya hopi desafio y a logra para firme y guia e organisacion. Aunke e no a sali hopi pa dilanti pa busca reconocimento, el a logra hopi cambio y modernisacion. Mi tabatin e placer di a traha hopi di cerca cun’e y manera nos tabata bisa He had his heart in the right place. Ami kier desea mi ex Chef y mi amigo, tur clase di exito den su siguiente reto pa sirbi nos pais. Tur cos bon Dolfi!”

Comments

comments