MIAMI, Merca- E Cubano Yoelvis Gattorno no a spera cu un mal noticia lo a bin hunto cu e nacimento di su yiu, Valeria.
Dia 2 Maart, net despues di a duna luz, su casa Yarisleidy Cuba Rodriguez a fayece den e hospital Jackson Memorial di Miami. E muhe a yega for di Cuba na october ultimo y tabata realisando e tramitenan pa trece Gattorno pa un reunificacion familiar.
Gattorno no solamente no tabata spera e noticia tragico, sino loke a bin despues: bringa pa e custodia di su yiu for di Cuba, despues di cu un hues a duna Nairobi Pacheco, prima di su casa, e custodia temporal di e mucha.
E Cubano a denuncia cu ora cu nan a duna e custodia temporal na Pacheco, el a perde e derecho di ta hunto cu su yiu, pa cual el a bisa di cu e lo pidi un visa humanitario pa drenta Merca y demostra cu e ta tata di e baby.
“Pachecho ta prohibimi di wak mi yiu”, Gattorno a bisa den un video call cu Univision, unda cu el a referi na e demanda cu Pachecho a introduci contra di e hospital pa mal practica como un estrategia pa gana placa cu e morto di su casa.
E hospital Jackson Memorial tambe a informa Gattorno cu e no por sigui den comunicacion cu Gattorno, ya cu su casa “nunca a duna un indicacion di ken ta e tata ni tampoco a duna niun nomber relaciona cu esaki”, segun un documento publica pa Univision 23.
E hospital a agrega cu e obliga na acepta Nairobis Pacheco como e persona cu custodia temporal di e baby riba ordo di hues.
E caso ta trece recuerdonan di Elian Gonzales, cu a origina di un disputa internacional entre Cuba y Merca, pa determina ken lo haya e custodia di e mucha, si su famia na Merca of su tata na Cuba. E bataya legal pa e custodia a wordo gana pa e tata, cu tabata biba na Cuba, despues di un despliegue propagandistico grandi di e gobierno Cubano, encabesa pa Fidel Castro.