BANGKOK, Tailandia- Cuater mucha mas a wordo rescata for di e cueba den e parti noord di Tailandia, caminda cu’n team di futbol hubenil a keda dos siman pega. A resta solamente cuater mucha mas como tambe nan coach.
E prome rescate di dia di e hungadonan di Wild Boar FC, kende nan identidad ainda no ta conoci, por a wordo mira riba un brandcard algo prome cu 7 or di anochi (ora di Aruba), algun ora despues di cu e di dos dia di rescate a cuminsa.
Muchanan number seis y shete a wordo saca algo mas di un hora despues, mientras cu mucha number ocho tambe a wordo rescata un rato despues.
Nan tur a wordo hiba riba brancard pa un ambulance, pa un rato despues nan wordo hiba Chiang Rai Pranukroh Hospital, caminda e otro cuater hungadonan rescata diadomingo ta recuperando.
E 12 hungadonan y nan coach, di 25 aña a wordo raporta como perdi. Nan a bay explora e cueba, pero a keda pega eyden. Door di awaseronan torencial, e cueba a yena cu awa, forsando e hobennan aki pa busca un luga mas halto pa nan siguridad.
E prome rescate di dia a bin un rato despues cu e hefe di mision, Narongsak Osottanakorn, a bisa cu e boternan di oxigeno ta cla y cu den e siguiene horanan lo tin bon noticia”.
E operación di rescate a cuminsa cuater ora prome cu e tabata plania, dialuna mainta.
Mientras tanto, mayornan preocupa sperando na e entrada, hopi di nan manteniendo vigilia a pesar di e awasero, a bisa cu ainda nan no sa cual ta e muchanan cu ta wordo rescata y cu nan no por haci nada mas, cu spera.
E mesun 12 buzonan, entrenan buzonan internacional manera di Merca y Inglatera, cu experiencia den ‘cave diving’, lo guia e operativo di dialuna, y ta spera cu e rescate lo bay mas lihe, mirando cu awo e buzonan ta mas familiar cu e circumstancianan.
Autoridadnan tin un careda contra di holoshi pa saca e muchanan y nan coach, for di e cueba mientras cu awaseronan relaciona cu monsoon tabata basha den oranan di anochi. Pero, esaki no a haci efecto ariba e nivel di awa den e cueba, unda cu trahadonan ta sigui pomp awa for di e cueba.