Deporte di Aruba y deportistanan a wordo neglisha y lubida por completo pa e Gobierno di AVP. Segun parlamentario di MEP, Dangui Oduber, por mira den ki estado complehonan deportivo ta, varios di nan den estado deplorabel, luznan ta casi cay riba deportistanan, luznan no ta funciona y asina por keda menciona con deporte a wordo poni un banda. Ta casi tur siman bo ta mira muchanan riba caya bendiendo rifa pa haya fondo pa por representa Aruba den exterior. Ta un lastima con AVP a maneha tur e entradanan di Lotto pa Deporte y kico tur nan a haci cu e fondonan aki. Canadian Bank Note a bira doño di Lotto pa deporte y awo enbes cu e entrada di Lotto pa Deporte wordo inverti den deporte na Aruba ta e grupo Canades y nan shareholdernan ta ricibi e ganashi aki. Anto pa haci e situacion mas pio bo ta haya miembronan di e bestuur di Lotto ta fiesta y biaha cu e placa y te hasta casa di parlamentarionan di AVP ta cumpra camara di siguridad cu e entradanan di Lotto pa Deporte. Recientemente mes Lotto pa Deporte a genera masha hopi entrada cu e benta di lotto mini mega cu a keda aden pa varios siman, E pregunta di oro ta, kico ta wordo haci cu tur e entradanan aki.
MEP a bisa cu nos tin un vision pa deporte unda nos kier mira deporte den futuro. En todo caso nos kier Lotto pa deporte bin bek den man di Aruba y pa tur pero tur entrada wordo inverti den deporte di Aruba. Nos lo construi complehonan deportivo nobo, nos lo mantene complehonan deportivo existente y tambe nos lo percura pa e faciladadnan y clubnan deportivo haya artificial turf. Nos kier pone artificial turf pa haci’e atracitvo pa e muchanan yega veld y duna nan un motivacion extra pa haci nan deporte faborito. Nos mester inverti den educacion y deporte pa asina por guia e muchanan cu ta nos futuro den e direccion corecto.
Deporte ta importante den desaroyo di un mucha y nos mester duna deporte e atencion cu merece. Cada voto pa MEP ta un voto na fabor di deporte y un voto pa mas placa wordo inverti den deporte!