Pa loke ta e meta di e evento aki, directora di Casa Cuna Sra. Quilin Arends ta splica cu e evento aki ta pa laga e muchanan di Casa Cuna y otronan menos afortuna y parti di muchanan di Imelda Hof tin nan ultimo weekend di vakantie cu actividadnan divertido. Tambe e ta un oportunidad pa personanan cu no a keda cla cu cosnan di scol pa nan yiunan, pasa y cumpra esakinan cu Casa Cuna por tin na prijsnan abou.
E fondo cu recauda cu e evento aki lo bay pa Casa Cuna manera a ser bisa anteriormente. E articulonan na benta ta bay ta tas, jeans, keds, potlood, etc. RDA ta sostene e actividad aki cu rifanan di articulonan cu e muchanan por gana. Lo ofrece cuminda bon prepara pa tur cu bishita Casa Cuna e dia aki. E ta un dia pa tur mucha pasa dushi prome cu scol cuminsa bek y alavez pa contribui na un bon causa.
Ademas, Casa Cuna ta haya bek locual nan mester a haya durante e añanan y ta uzando esaki pa mantencion di nan edificio y nan ta bezig cu proyecto pa mamanan hoben. Awo nan ta enfoca tambe pa muebla e interior y cuminsa prepara e personal. Tambe ora e Crisis Plan wordo ehecuta, nan lo haya fondo pa por ehecuta e resto di plannan rib’e proyecto di mamanan hoben. Sin menciona cu Casa Cuna mester di mas personal di acuerdo e cantidad di muchanan cu nan tin.
Y vooral despues di e sucedido di aña anterior cu e cantidad di mucha a aumenta y tin tiki personal. Pa e tipo di muchanan cu nan ta trata cun’e ta dificil pa traha ora ta cu e parti di mucha y boluntario, pues e muchanan hopi biaha ta muchanan traumatisa y e boluntarionan mester por tin experiencia y educacion adecuado pa por traha cu e muchanan. Nan a logra haya un Infant Mental Health specialist cu ta yudando Casa Cuna tres biaha pa siman. Nan tin un orthopedagoog cu tambe ta yudando nan.
Tambe nan ta dunando mamanan curso na Casa Cuna, siñando nan den sesionnan hunto cu e specialistanan aki pa mira con nan ta trata e yiunan y mira kico nan por mehora den dje. Esey ta dunando bon resultado, pasobra Casa Cuna e ora no ta solamente cuida e muchanan, sino siña e mamanan tambe con pa cuida nan yiunan miho. Tambe nan ta buscando pa soluciona e problema di falta di personal structuralmente p’asina por brinda miho servicio na e muchanan y e mamanan.