Mirando cu nos ta un isla chikito y nos ta rondona di awa, nos tin cu tene hopi na cuenta loke ta nos nivel di lama. Donny Rasmijn, miembro di fraccion di AVP den Parlamento, a splica cu ta hopi interesante pa tur pais na mundo y siguramente pa Aruba y e otro islanan, cu ta Small Island Development States, siguramente nos paisnan, e islanan, ta paisnan unda cu en conexion cu subimento di nivel di awa mundialmente, cual ta bay pa motibo di calentamento mundial, unda cu cada aña nos ta mira cu e temperatura di mundo ta subiendo y cun’e ta bay haya cu cada biaha e nivel di lama ta bay subi. Esey ta nifica cu na GOP 21, na Paris, di December 2015, tin acuerdonan cu a wordo firma cu 193 pais, unda cu tur a bay di acuerdo pa cuminsa reduci e cantidad di fossil fuel cu nan ta uza. Esey kiermen reduci uzo di diesel, fuel oil, cuminsa reduci nan, pa asina por tin su efecto cu ta bay reduci e calentamento di mundo den e añanan cu ta bin. Durante di e mesun GOP 21, tambe tabata tin atencion special pa SIDS y aki por bisa cu prome minister tabata tey presente, y a hiba un tremendo discurso. El a trece dilanti cu despues cu e paisnan a firma, Aruba tambe a firma pa mantene su mes na e acuerdonan aki y esaki por bisa tabata un innovacion. Semper Aruba tabata cay bao di Hulanda, ora cu ta trata Nacionnan Uni. Ta haya nos maneho of cifranan ta cay bao di Hulanda y por bisa cu e bon logronan cu tin den nos pais, nunca tabata wordo refleha mundialmente.
E cifranan cu Nacionnan Uni tin, semper ta papia di Hulanda y ta inclui nos. Aruba specificamente no ta haya cifra di nos. Awor aki, door di e acuerdonan aki tambe, ta wak cu Aruba a bin bek. A lanta un centro di inteligencia, unda cu aki Aruba su profesionalnan hoben ta traha riba e tereno aki y ta trahando conhuntamente cu tur pais den mundo, siguramente e islanan cu tambe ta den e peliger aki, ora cu nivel di awa subi, nan isla ta wordo tapa cu lama. E trabaonan ta moviendo hopi bon segun Rasmijn y por mira un progreso riba e tereno aki y por bisa cu nos por ta orguyoso di nos pais cu nos por ta un di e lidernan riba e tereno aki mundialmente.