Definitivamente nos sa cu lesamento ta un actividad ludico completo y cu no solamente ta beneficioso pa e mucha su desaroyo di vocabulario y comprension, pero acerca ta bin cu storia ta bon pa e mucha su desaroyo personal intelectual tambe. Un storia ta trece un acercamento na e balornan moral, manera por ehempel amor, respet y responsabilidad, transmiti na un manera divertido cu ta inculca un conducta sano y positivo cerca e mucha.
Ta dificil tin ora pa hopi mayor, pa traspasa tur loke ta considera un bon ehempel, pa e muchanan. Esaki mirando con involucra tur hende ta den e mundo actual, cu ta expone tur clase di oferta material atractivo y tin ora inecesario na e muchanan. Material cu ta alabes superficial na nos necesidadnan pa inculca den e futuro generacion conceptonan basico manera balornan familiar.
No obstante cu cuenta di hada ta storianan infantil, unda e muchanan ta alimenta nan pensamento cu fantasia hibando nan mas leu cu ficcion mes por hiba nan, den e storianan aki ta bin dilanti elementonan cu tambe ta interesante pa e publico adulto, manera ansiedad di mira un solucion pa e problema of buskeda di felicidad den un final feliz, pues e nececidad di soña lanta ta biba cerca un adulto.
E cuentanan di hada cu Tanto Cuenta a scoge pa dramatisa dia 2 di Juni, ta esnan clasico cu ta trata algun di e balornan humano manera amor, confiansa y honestidad. Den e cuenta Drumi Dushi e publico por aprecia personahenan cu ta transmiti e bon y mal virtudnan di hende, manera di un prinses amabel y obediente, pero tambe di un bruha mal hende, gañado cu ta gusta haci trampa. Elementonan cu ta bon desaroya tecnicamente cerca e elenco di Tanto Cuenta, pa medio di dedicacion semanalmente na e ensayonan. Tur e elementonan aki ta hiba e storianan den un dimension reconocibel pa e muchanan y ademas cu tokenan cultural Arubano.
Den e edicion di awe Tanto Cuenta kier presenta dos artista cu lo desplega un di e rolnan gusta pa chikito y grandi den un cuenta di hada, cu ta e hada madrina. E prome artitsa ta Liesenny Croes-Geerman
Su amor pa lesamento y su pasion pa actuacion a acerca Liesenny pa participa na Tanto Cuenta. E ta gusta actua y den pasado a forma parti di un grupo di teatro bou guia di Shi Preke. E ta masha activo riba tereno social y cultural y ta forma parti di e coro di un grupo di gaita. For di chikito e gusta lesa y conta storia. Liesenny su rol den e cuenta di hada ta di un hada madrina. Pa Liesenny ta parce cu ora e ta actuando e ta drenta completamente den su rol y hasta e ta sinti cu e por haci magia. Ademas di un caracter suave di e rol cu e ta desplega, e resplendor di un hada madrina, cu ta uza su magia pa transforma, ta e toke principal cu ta pone su personahe briya.
E otro artista pa awe ta Angela Croes-Hernandez. Un figura conoci cu scenario, pasobra Angela no ta desconoci den e mundo di actuacion. Ultimamente el a actua den un obra como princesa Bella. Den e cuentanan di hada di Tanto Cuenta, e lo hunga e papel di un hada madrina. Angela ta mira e rol
di un hada madrina como uno magico. E ta encanta cu obranan cu ta contene fantasia y magia, pasobra e ta un fanatico di magia. For di mucha Angela gusta storia y a lanta na cas cu lesamento di buki. E ta un maestra di scol y gusta lesa pa e muchanan, unda cu e ta pone actuacion den su storianan. Angela ta gusta traha cu mucha y p’esey a acepta pa yuda den e obra na Cas di Cultura.
Angela no tin duda cu e lo eherce e rol di su personahe dia 2 di Juni bon y cu sigur su personahe lo ta capas di transforma y cumpli cu e deseo di e publico.
Un recordatorio pa e lectornan cu kier presencia e tres obranan presenta pa Tanto Cuenta dia 2 di Juni venidero na Cas di Cultura, pa cumpra nan carchi mas lihe posibel na e diferente luga di benta manera Van Dorp/ De Wit, Botica Paradera, Dyon Party Center y na oficina di Bon Nochi Drumi Dushi.