SMAC ta contento cu resultadonan di e prome parade di mucha, Parada di Blaas cu aa tuma luga Diadomingo ultimo a tuma luga na San Nicolaas. Mas di 1600 participante tabata riba caminda den nan fantasia di blaas, gosando di e ritmonan dushi di e bandanan.
E parada a sali pa 2:02 di atardi, y por a mira caranan contento di e muchanan hunto cu mayornan y lidernan di grupo. Habriendo riba e dushi ritmo di asambeho di Quality Brassband, sigui pa gruponan Deja Kids y Centro di Bario Noord hunto cu Banda STEAM cu porcierto a participa den un parada pa prome biaha cu ritmonan pegahoso y bon sonido. A sigui Grupo nos Futuro hunto cu banda NBO, por a mira e indjannan chiquito gosa cu animacion di lidernan di grupo y canticanan popular pa nos muchanan.
Siguientemente a sali TOB cu nan fantasia di Payaso y animacion di banda ‘N Fuzion. Ungrupo hopi colorido y alegre y bailando sin fin riba bon musica y animacion. Nos por a wak grupo nobo Pink Kids tur na roos, gosandoriba e ritmo trankilo y unico cu banda Le Groove a presenta. Ultimo grupo tabata Little Groovers hunto cu Champagne Kids cu tema islanan ABC. Un bunita grupo uni cu a gosa sin fin di e banda energetico BMW. E parada bunita aki a cera cu Massive Brassband cu a sa di duna un bon presentacion.
Na dos ocasion un awasero duro a cay, pero esaki no a para ni e muchanan, ni e bandanan pa sigui cu e parada. Cu animacion di e publico grandi canto di caminda, a sa di sigui cu hopi ambiente y goso.
SMAC kier manda un pabien na tur e muchanan, lidernan di grupo y bandanan cu presenta riba caminda. Pabien na Jeanine y Magaly di e Comishon di Parada di Blaas pa e bon guia. Alabes un danki special na KPA pa nan presencia y sosten den parada y pa cu e orden publico.
Na tur otro instancia cu ta presente durante e actividadnan di SMAC, un gradicimento na nan, y e dedicacion pa haci e prome parada di mucha posibel. Por ultimo un danki na e publico carnavalesco pa nan apoyo na e muchanan.