Den e ultimo dos siman, Cruz Cora Aruba den colaboracion cu Defensa di Reino, a cumpli cu un bunita trabou na Haiti. Den momentonan dificil asina, Cora Cora ta purba semper di duna mas ayudo cu e por na nos paisnan bisiña. Den pasado tabata tin ocasion cu Cruz Cora Aruba a biaha pa yuda na St. Maarten, St. Lucia, Haiti y otro paisnan den Caribe cu a sufri di un desaster natural. Pesey e biaha aki tambe, manera cu e oportunidad a surgi pa uni na marina cu e mision humanitario pa Haiti, mesora a mobilisa y prepara awa, lona, tent, shelterboxes y otro materialnan cu mester na Haiti. Den algun ora a planea e biahe pa boluntarionan Marla Thiel-Dominguez y Luigi André Petrocthi, cu ta forma parti di Disaster Team di Cruz Cora Aruba.
Asina den menos cu 72 ora, nan tabata rumbo pa Haiti riba e Z.M. Holland. Den transcurso di e siman, Marla y Luigi a haci un tremendo trabou y supervisa entrega di tur e material cu a manda. Nan a yuda den hospital Immaculatee Conception na Les Cayes. Marla y Luigi a yuda desinfecta interior di e hospital.
Na Anse D’Hinault a sufri hopi daño y a hiba tent, awa y cuminda. Tambe a distribui material na Jeremie cu 8 helicopter Mericano. Den e mapa di Haiti adhunto, por wak stippelijn di Les Cayes pa Port Au Prince, ruta cu a nabega varios biaha durante e 12 dia. E puntonan cora ta mustra e pueblonan cu a bishita, cu a haya cuminda, awa, juice y productonan di higiena. Liña oranje ta mustra unda a entrega lona y liñanan zig zag ta indica unda a entrega tent di Cruz Cora Aruba.
Esaki tabata un experiencia unico pa Marla y Luigi, cu lo comparti esaki cu coleganan di Cruz Cora Aruba awor cu nan ta bek na Aruba. Un biaha mas, un bunita muestra di e trabou di Cruz Cora:
ALIVIA E SUFRIMENTO DI ESNAN MAS VULNERABEL
A puntra Marla pa su impresion despues di e mision humanitario aki, y cu hopi emocion, el a contesta “E hendenan aki tabata asina desespera sin nada di bebe of come. Pa wak e alegria riba nan cara, con nan tabata bati man y canta ora nan tabata wak nos yega y baha awa, juice y cuminda pa nan na costa. E emocion cu esey ta duna bo, e satisfaccion cu bo ta sinti. E ta haci 12 dia riba barco, leu for di cas y famia completamente bale la pena. E caranan ey ta bay keda graba den mi memoria semper”.
Cruz Cora Aruba ta hopi orguyoso di Marla y Luigi y ta gradici nan pa e bunita trabou! DANKI.