E ola di criminalidad bou e maneho desastroso di e Gobierno actual ta sigui kibra tur record. Den fin di siman nos isla a bolbe wordo asota cu dos atraco serio den menos cu 12 ora. Un na un cas na Cura Cabay unda cu un señora di edad a wordo atraca y herida den oranan di marduga. Riba e mesun dia un comerciante cu su trahadonan a bira victima di otro atraco violento.
E ultimo atraco a tuma luga den dia cla y den un area unda turistanan crucero ta frecuenta tur dia. Pues e ola di criminalidad no solamente ta afectando nos comunidad seriamente pero alabes ta forma un menasa serio pa nos turismo, cual ta e pilar economico cu nos isla ta sostene riba dje.
Den 8 aña di gobernacion ni e Minister di Husticia ni e Prome Minister actual no a sa di percura pa un plan efectivo pa preveni y combati criminalidad. “Nan ta puro show, nada di contenido”.
Andin: “Por a tuma nota cu e Minister Dowers ta campaña cu e palabra “duro”, pero e realidad amargo ta cu Dowers ta hopi zwak, paso e no a sa di a atende den 8 aña como Minister cu e ola di criminalidad cu ta afectando nos isla.”.
Ainda ta fresco den nos memoria con e Minister a bay tuma vestnan di siguridad regalo for di un compania priva, confirmando asina cu den 8 aña e no a cumpli cu su trabou di ekipa nos Cuerpo Policial manera debe ser.
Na momento cu partido POR drenta den gobernacion nos tin e Plan Vision 17-21 cla pa ehecuta. Lo duna debido atencion na nos Cuerpo Policial unda cu lo percura pa mas ekipo moderno, visibilidad y proteccion, mehora e comunicacion y relacion cu e comunidad, y duna informacion y conseho di kico e habitantenan y comercio por haci den cooperacion extenso cu Cuerpo Policial, pa evita cu nan ta bira victima di malhechornan. Lo subsidia sistemanan di alarma. Tambe lo mehora proteccion di nos costanan, pone iluminacion den areanan vulnerabel y mas vigilancia cu ayudo di radar y drones.
Mester frena e ola di criminaldad inmediatamente pa brinda nos ciudadano y bishitantenan e proteccion necesario y alabes salbaguardia nos turismo.