AMSTERDAM, Hulanda – Polis a detene diasabra ultimo un criminal di droga Italiano na Alsmeer, kende tambe den su pais, tin cu sinta un castigo di prizon di 20 aña. Calogero Nicosia (48), segun medionan Italiano, 11 aña pasa el a wordo condena pa corte na Ravenna pa trafico masivo di droga internacional. Ta pa casualidad el a wordo aresta.
“Coleganan a mira un auto bieu ta core y a dicidi di bay wak den sistema. Ora cu a bin resulta cu su nomber ta para como un persona cu ta wordo busca pa husticia internacional,” un vocero di polis a bisa diahuebs. Durante control, e conductor en berdad tabata e traficador di droga condena. Riba su entrega na Italia, polis no por a bisa nada.
Segun medionan Italiano, el a trafica Cocaina entre Italia y Hulanda.
Fuente: ANP