SAN JOSE, Costa Rica – Den menos di un aña y mei, e matrimonio entre dos homber of dos muhe lo ta un realidad na Costa Rica. E Sala Constitucional di e Tribunal Supremo a declara articulonan cu ta prohibi matrimonio y union entre personanan di e mesun sexo. Pero ta laga vigente e normanan pa 18 luna pa asina Congreso drecha e ley aki.
Den e resolucion, cu a genera polemica tanto den opositornan como den defensornan di e union aki, ta señala cu si Congreso no aproba ningun ley, e dos normanan lo keda automaticamente elimina den e plazo di 18 luna.
“Ta urgi e Asamblea Legislativo, den uzo di su funcion legislativa constitucionalmente asigna, pa den un plazo di 18 luna drecha den marco huridico nacional cu e finalidad di regula e alcance y efectonan deriva di e relacion di pareha entre personanan di e mesun sexo”, segun e sentencia di e Sala Constitucional cu e fecha 8 di augustus.
Sin embargo e Asamblea Legislativo ta un organismo fuertemente conservador den cual 14 di su 57 miembronan ta pertenece na e Partido Restauracion Nacional, di naturalesa evangelico y cu ta keda opone na matrimonio igualitario.
Iglesia Catolico tambe a halsa su voz contra di e sentenccia, expresando su defensa di e famia tradicional y sigurando cu “no kier discrimina personanan homosexual no ta autorisa Estado na confundi e orden natural di matrimonio y famia”.
Pero gobierno di Costa Rica ta busca igualdad, Carlos Alvarado, a ratifica e compromiso di su gobierno cu igualdad y e proteccion di e derechonan humano di tur famia. Alvarado ta un ex strea di rock den su pais y ta den e cargo solamente for di april, ora cu el a gana e carrera electoral hincando den su programa reformanan na fabor di e colectivo LGBTI.