TAIPEI, Taiwan, CHINA- E prinicipal huesnan di e Taiwan a dicta un fayo na fabor di un matrimonio homosexual, habriendo caminda pa bira e prome pais na Asia pa legalisa matrimonionan di mesun sexo.
E Corte Supremo a dicta cu e leynan actual ta stroba miembronan di e mesun sexo pa contrae matrimonio, ta viola nan derecho na igualdad y tambe di ta inconstitucional.
Parlamento a haya dos aña pa reforma e leynan existente of traha leynan nobo.
E decision sin precedente di diaranson ta bin na momento cu miembronan di e comunidad LGBT ta enfrenta aumento di persecucion den e region.
E decision di Corte pa parlamento di Taiwan ta nifica cu e lo mester reforma e leynan existente of traha leynan nobo.
Pero no ta mucho cla te con leu Parlamento lo yega.
E comunidad LGBT ta spera cu e legisladonan lo simplemente reforma e leynan existente di matrimonio pa inclui parehanan di mesun sexo, cual lo por dunanan mesun derecho cu parehanan di sexo opuesto ta gosa di dje, incluyendo adopcion y herencia. Tambe cu nan lo por tuma decisionnan pa otro den caso di emergencia medico.
Gruponan religioso y di mayornan ta opone na matrimonio homosexual y ta bisa di lo bringa parlamento pa no pasa niun ley nobo. Nan ta di opinion cu un decision asina importante no mester wordo tuma door di un grupo di hues pero door di e pueblo en general pa medio di un referendum.
Ambos banda lo focus awo pa persuadi e legisladonan.
Taiwan, un provincia cu auto- determinacion, riba cual China ta ratifica su soberania, ta conoci pa su posicion di balornan liberal y ta organisa e evento di “gay pride” mas grandi den e region.
E impulso pa igualdad di matrimonio a bin ta constuyendo for di aña pasa, na momento cu e actual presidente Tsai Ing-wen, cu ta apoya e movimento aki abiertamente, a yega na poder.
Fuente: www.bbc.com