Corte: Abogado mr. Bikker ta señala cu tin dos ley contradictorio pa cu tiramento di pisca cu harpoon

Dialuna mainta tabatin un discusion interesante den Corte Superior entre abogado mr. Andin Bikker y Procurador General. Parlamentario mr. Bikker a kita su bachi di Parlamentario y a bisti su toga di abogado pa haci un test case riba un caso cu e ta haya tin contradiccion formal pa cu usamento di harpoon.

E abogado a señala cu segun e ley Marine Mileu Verordening, ta prohibi pa tira cu harpoon, mientras cu tin un ABV cu ta permiti pa tira pisca riba un distancia di 50 meter for di costa. Ademas e abogado a mustra cu segun e ley di Proteccion di Naturaleza, tin prohibicion pa tira pisca di coral pero cu por haya dispensacion pa haci esaki. E prohibicion pa tira pisca ta conta solamente pa piscanan cu ta core peliger di keda elimina.

E abogado a remarca pakico ta permiti tira Lion Fish pero no por tira pisca normal. Tur dia restaurantnan tin nan “Catch of the day”. E ta haya cu aki tin fayo den Legislacion y e fayo aki no por perhudica e homber G. kende ta wordo persigui pa a tira cu harpoon na altura di Malmok. E ta haya cu Legislacion mester a elimina e Marine Mileu Verordening y laga e ley di Proteccion di Naturaleza vigente.

Procurador General a remarca cu no a elimina e Marine Mileu Verordening pasobra lo crea un bashi den e proteccion di naturaleza. El a splica cu e ley di Proteccion di Naturaleza ta riba Marine Mileu Verordening. Segun PG e tiramento di Lion Fish ta pa proteha nos bida marina cu ta core peliger door di Lion Fish. Ademas e sospechoso G. a wordo gara prome cu a introduce e ley aki. Hof ta bay studia e caso y otro luna sentencia ta cay