Den cuadro di e proyecto Opschoning Bevolkingsregister, den encargo di CENSO, CORE N.V. lo haci bishita di cas na personanan cu tin duda cu ta biba na Aruba y cual no a reacciona tampoco na niun di e yamadanan por medio di carta y medionan di comunicacion. E bishitanan aki lo tuma luga entre dia 6 di April te cu dia 21 di April 2017.
CORE N.V. a tuma e siguiente pasonan caba pa drenta den contacto cu e personanan aki: den e periode December 2016 – mita di Januari 2017 un carta di yamada a wordo manda na e adres di e personanan concerni y den Maart 2017 a publica ID-number di e personanan aki den medionan di comunicacion y riba website di CENSO. E personanan aki a wordo yama pa controla si di berdad nan ta biba na Aruba y riba e adres registra na Registro di Populacion (bevolkingsregister).
Como di tres y ultimo paso, CORE N.V. en cooperacion y asistencia di CBS Aruba, lo bishita cas di esnan cu no a reaciona riba e carta of riba e publicacion di ID-number den medionan di comunicacion y riba e website di CENSO.
Representantenan lo bishita alrededor di 5050 adres den e periodo entre dia 6 di April te cu dia 21 di April 2017 pa asina controla e residencia real di aproximadamente 7979 persona. Nos ta pidi tur hende cu ta ricibi un representante di e organisacion na cas, pa duna tur cooperacion necesario na e proyecto aki.
Cada representante di nos organisacion lo tin un badge di identificacion cu su potret, nomber y fam riba dje y tambe informacion di e empresa CORE N.V. Ademas, tur representante lo tin un carta cu informacion tocante e proyecto aki hunto cun’e.
Si acaso nos representante a pasa na un momento cu e persona indica no ta na cas, lo laga un carta p’e.
Nos ta pidi e persona concerni, pa por fabor sigui e instruccionnan den e carta, ya cu esaki por tin consecuensia pa bo registracion den Registro di Populacion. E doño of habitante di cas tambe por tuma contacto cu CORE N.V.
Ta hopi importante pa pais Aruba dispone di un Registro di Populacion corecto y confiabel. Cada ciudadano ta obliga pa ley pa duna CENSO datonan corecto pa asina mantene e Registro di Populacion corecto y actual.
Hunto nos tur ta responsabel pa un bevolkingsregister corecto y confiabel pa asina garantisa sostenibilidad di nos fondonan social.