MOSCU, Rusia- E seleccion anfitrion di Rusia 2018 diahuebs a derota Saudi-Arabia, ambos den grupo A, cu cinco gol den e partido inaugural di e campeonato.
E Ruso, Yuri Gazinsky a anota e prome gol di mundial na di 12 minuut cu’n cabesaso den e stadion Luzhniki, esun mas grandi di Rusia, yena cu 80 mil persona.
E di dos gol a yega pa cuenta di Denis Cheryshev na di 43 minuut despues di un un carera fulminante, segun e agencia di noticia AFP.
Artem Dzyuba a anota e di tres gol na di 70 minuut cu un otro cabesaso, despues di a drenta na di 69 minuut den reemplaso di Fiódor Smólov.
Cheryshev a anota su di dos gol di e encuentro den e di 71 minuut, e di cuater di su seleccion. E ultimo di e encuentro a yega pa cuenta di e Ruso Aleksandr Golovin den un tiro liber.
Un ceremonia inaugural modera a precedi e prome partido di mundial cu’n actuacion aclama di e cantante Ingles, Robbie Williams y e conocido soprano Ruso, Aida Garifullina.
“Mi ta felicita boso pa e comienso di e campeonato mas importante di mundo”, presidente di Rusia, Vladimir Putin a sigura durante e inauguracion oficial di e evento.