BOGOTA, Colombia – Copa Holdings a lansa diahuebs na Bogota, e aerolinea di costo abao Wingo, cu lo yega na 16 destino den 10 pais di America Latina y Caribe y cu ta busca pa expande den un mercado cu ta wordo considera hopi “prometedor” den e region, e responsabel di e firma nobo, Catalina Breton, a bisa.
Entre e destinonan cu e aerlinea nobo aki lo cubri ta Cancun (Mexico), Havana, Aruba, Punta Cana (Republica Dominicana), Ciudad di Mexico, San Andres (Colombia), Ciudad di Panama, Quito, Caracas y Cartagena.
“Wingo lo conecta Colombia cu otro destinonan Latinoamericano riba un prijs abao, pero cu e promesa di mantene e calidad y en especial, e cumplimento,” Breton a afirma tras e presentacion na Bogota di e linea aerea, cu lo cuminsa cu e operacionnan dia 1 di December proximo.
“Nos lo bay concentra pa nos vuelonan cumpli cu e itinerarionan estableci y cu e biaheronan tin un experiencia “di buena onda,”, el a splica.
E flota di Wingo lo conta inicialmente cu cuater avion Boeing 737-700, cada un cu capacidad pa 142 pasahero den cabina unica y e expectativa di e empresa ta pa “alcansa 85 mil asiento mensual,” cu 70 frecuencia semanal y 20 vuelo diario, Breton a detaya, kende a ocupa cu e cargonan directivo na Avianca y Jet Blue Airways.
“Cu Wingo nos kier potencia biahe den e region, cu ta hopi abao. Por ehempel na Colombia, aunke ta e tercer pais cu mas trafico aereo di Latino America, tin un promedio di 0.5 biahe per capita anual y solamente dos di cada dies Colombiano a biaha internacionalmente,” e lider di e aerolinea a sostene, kende ta considera cu e sector “low cost” ta hopi prometedor.
Segun datonan divulga diamars ultimo pa e Asociacion Internacional di Transporte Aereo (IATA), e sector na Latino America lo crece un 3.8% anual, loke ta nifica cu pa 2035 e industria aereo lo sirbi 345 miyon di pasahero mas cu respecto e actual 313 miyon.
Ta calcula cu ademas e 40% di e pasaheronan di e region ta biaha den lineanan di costo abao y aviacion ta genera mas di 4.9 miyon di trabao y ta contribui cu 153 mil miyon di dollar na e producto interno bruto (PIB).
Copa Airlines y Copa Airlines Colombia, subsidiarionan di Copa Holdings, ta ofrece actualmente buelonan na 74 destino den 30 pais di Norte, Centro y Sur America y Caribe.
Fuente: NTN24