Un bes mas lo bay tuma lugar un conteo nacional di parha pa cual e biaha aki esaki lo ta organisa pa Parke Nacional Arikok, CBS y Aruba Birdlife Conservation. Diego Marquez kende ta director di e parke a splica mas di e meta di evento aki. Den 2011 a organisa e prome conteo. E intencion ta pa tene e conteo aki den e orarionan di 7 pa 9 or di mainta y por haci e conteo den 15 minuut. E aña aki e formulario ta mas extenso cu preguntanan extra. E intencion ta pa haya sa cual ta e parhanan cu ta den cura di e ciudadanonan y si nan tin neishi of no. Tambe lo puntra si tin boa den cura y si tin awa y cuminda pa e parhanan.

Mescos cu e prome aña ciudadanonan mester sinta den nan cura y registra e parhanan cu nan ta wak. Riba e formulario ta haya tur parha y e ciudadano por marca cual el a wak. Tambe lo tin lugar pa registra e neishinan. Importante ta pa registra tambe si bo no a wak niun parha den bo cura. Tur resultado ta conta y si bo no tin parha den bo cura, tambe ta importante pa anota esaki. Tambe si bo mira parhanan straño cu no ta aparece riba e formulario, ta importnate pa registra esaki y describi kico bo a mira.

Hopi biaha PNA ta ricibi keho cu boanan ta come tur parha y pa e motibo aki a inclui e parti aki tambe riba e formulario ya nan por mira si enberdad tin un corelacion entre presencia di boa y e cantidad di parha presente den un cura.

Por ultimo ta importante pa ciudadanonan cu participa den e conteo, pa nan yena nan datonan personal riba e formulario. Esaki ta necesario paso e adres ta uzando pa registra e region y door cu ta coopera cu CBS e datonan aki ta importante pa e registracion di localidadnan paso asina nan por haci un registracion mas specifico. Muchanan di scolnan secundario tambe lo haya e formularionan pa asina nan participa.