Sentimento di e consumidor a empeora den e di cuatro trimester di 2017 segun e ultimo resultadonan di e Encuesta di Confiansa di Consumidor (CCS) di Banco Central di Aruba (BCA). E Indice di Confiansa di Consumidor (CCI) a sera na 94,6 compara cu 95,6 den e trimester anterior, indicando sentimentonan relativamente pesimista (Grafiek 1) .
Apesar di sentimentonan negativo en general, consumidornan sinembargo tabata positivo riba nan situacion financiero personal actual, cu un indice cu a yega na 101,2, esta relativamente optimista. Consumidornan tabata mustra hopi mas confiansa riba nan situacion financiero pa futuro (102,6). E otro componentenan di e situacion actual di e consumidor tabatin resultado mas pesimista compara cu e encuesta anterior, causando un bahada chikito den e Indice di Situacion Actual for di 94,8 te na 94,3 (Grafiek 2).
E expectativanan di e consumidor a baha di 97,3 pa 96,3, causa pa gran parti door di sentimento negativo riba e condicionnan economico y di negoshi pa futuro, expectativanan abou di trabou y tambe expectativanan (mas abou) posicion financiero di gobierno.
E Indice di Habito di Consumo tambe a empeora den e trimester bou di revision (Grafiek 2). E mayoria di consumidornan a indica cu no tabata apropia pa cumpra un auto (74,1%), ni pa haci un prestamo (72,0%) of tuma un hipoteca (86,0%). E gran mayoria di respondientenan (78,4%) ta anticipa cu prijsnan lo subi den e siguiente 6 luna resultando na un Indice di Expectativa di Prijs di 90,7.
Resumiendo, e empeoracion den confiansa di consumidor ta atribui na caidanan den tur componente di e Indice di Confiansa di Consumidor ( Tabel 1).