Diabierna atardi e proyecto pa construccion di MFA Savaneta a conoce un momento masha importante y esey ta e momento di Spantenbier. E tradicion ta marca e punto mas halto di construccion pa e edificio di dos piso, pero tambe muestra di con e trabounan ta canando optimalmente.
Gobierno, contratista y otro partidonan envolvi den e proyecto no kier a laga e tempo di awa stroba e ocasion y a sigui cune celebrando cu trahadornan. Arkitecto ta Serge Thijsen, construccion ta den man di compania local Custom Contractors y Eric Vrolijk di DOW ta directie voerder.
E di tres MFA riba nos isla ta programa pa keda cla den luna di november, brindando asina henter e districto di Savaneta un joya di facilidad caminda lo ofrece multiple servicio publico ademas di fungi como punto di encuentro social y cultural, entre otro.
Omar Harms di Ministerio di Asuntonan General a duna di conoce cu ademas di Hulpbestuurskantoor, Servicio di Impuesto, cafetaria y biblioteca, ya ta papiando cu otro instancianan publico y priva cu ta interesa den haya un espacio y ofrece servicio for di MFA Savaneta.