WASHINGTON, D.C., Merca- E consehero di siguridad nacional di e mandatario Mericano, Donald Trump, diabierna a reuni cu e presidente di e Asamblea Nacional di Venezuela, lidera pa oposicion. Nan a acorda cu e crisis politico na Caracas mester yega na un fin rapido y pacifico.
E consehero di siguridad nacional H.R. McMaster y e presidente di Asamblea Nacional di Venezuela, Julio Borges, a “discuti riba e necesidad pa gobierno mantenen su mes na e constitucion Venezolano, libera e presonan politico, respeta Asamblea Nacional y pa bin eleccionnan liber y democratico” segun secretario di prensa di White House, Sean Spicer, den un comunicado.
Presidente de Venezuela, Nicolás Maduro, cu ya pa varios siman caba ta enfrentando protestanan contra di su gobierno, dialuna ultimo a anuncia e creacion di un Asamblea Popular, cual a wordo mira door di su opositornan como un golpi di estado pa asina tuma poder di e Asamblea Nacional. Borges a haci un yamada na e pueblo Venezolano pa nan rebeldia contra di e decision aki.
Fuente: Reuters