FTA ta bay tene su congreso oficial den September. Prome cu esey sosode, nan mester tene un pre-congreso. Sr. Hubert Dirksz, di FTA, ta amplia.
Sr. Hubert Dirks ta splica cu nan mester conscientisa e miembronan riba kico ta nan rol den congreso. E congreso ta un poder legislativo cu tin e rol di evalua e organisacion, evalua kico tur directiva a haci e ultimo tres añanan y e tin cu bin cu discusion of debatenan pa wak den ki direccion FTA mester bay. E no mester solamente wak e situacion di trahado, sino tambe e clase trahado den su totalidad y tur loke ta conta pa e trahado y su famia. Nan ta splica nan kico ta importante di e preparacion, kico ta e proceduranan durante e congreso, kico ta e reglamento di e debate y e reglamento di congreso, con e ta hinca den otro, y con ta haci mocionnan, etc. Esey ta yuda pa nan tin un congreso exitoso. Den un dia manera esaki, e miembronan ta trece otro puntonan dilanti. Nan ta trece tur e problemanan cu nan ta confrontando na pia di trabou of den comunidad. Por ehempel un grupo a papia di e poder di compra cu ta un problema y unda hende lo bay yega cu e situacion ey. Tambe a papia di con trahadonan no ta wordo trata manera mester ta na trabou. Nan ta kere cu inspeccion di parti di departamentonan di Gobierno, sigur e Departamento di Labor, lo hunga un rol importante den coregi e ilegalidad cu ta tumando luga na pia di trabou. Nan ta kere cu e sub-contratacion cu ta tuma luga y e leynan pa esey pasa, pero no manera e ta pasando na Aruba. Dor di esey lo ta na su luga pa e congreso cu ta bay bin pa nan tin mensahenan hopi cla y urgi Gobierno pa cumpli cu su tarea y laga departamentonan concerni haci nan trabou manera mester ta.
Segun sr. Dirks, nan a pone den puntonan cu nan a entrega na Gobierno pa loke ta e puntonan di atencion pa e gobernacion. Si conscientisa hende riba e leynan, pero no tin control ni multa ta cay pa esunnan cu no ta cumpli, e situacion ta keda mesun leu. Si duna multa pisa na esunnan cu ta comete e erornan aki, e ta yuda mantene orden y haci cu hende ta pensa mil biaha prome cu e dicidi di comete e erornan aki. FTA ta spera esey di Gobierno. Pero sr. Dirks ta lamenta cu ainda ta mira e sintomanan aki. Nan a trece na conocemento di e Minister concerni un lista di puntonan y un lista di prioridad acerca di esey. FTA ta spera cu esakinan wordo atendi. Na comienso di aña, FTA a papia cu Gobierno. Sr. Dirks ta mustra cu si e preocupacionnan bin dilanti, pero no tin ehecucion manera mester ta, ta bay tin problema. Loke si Minister di Labor ta intentando ta pa crea un structura tri- partite di acuerdo cu exigencianan di AILO p’asina hiba dialogo. Pero sr. Dirks ta mustra cu no por warda asina largo prome cu trabounan cuminsa tuma luga manera e parti di inspeccion na pia di trabou. Y tampoco inspecciona solamente un luga cu ta funciona bon. Mester inspecciona tur caminda. Y mester bin multa si ta necesario. Mester pone mas hende den e departamento cu tin e autoridad y caracter pa haci of ehecuta e trabou p’asina por coregi e situacionnan.