Diadomingo 10 di juni 2018 pa mas o menos 9 or y 25 di anochi, polisnan tabata tene un control rutinario den casnan di pueblo na noord. Na altura di Duartestraat, percela nr. 8, polisnan ta wak un Nissan March color bruin, para na altura di dicho percela. Den e auto tabata tin tres persona. Mientras cu polisnan tabata pasando banda di e auto, nan a haya un holor fuerte di marihuana. Na e momentonan ey, no tabata tin niun otro persona den cercania. Ora cu polisnan a baha for di patruya, nan a wak con e chauffeur a baha y a tira un sakito den cura di e percela ya menciona. Polisnan a lusa den e cura, unda cu nan a haya un sakito yena cu piedra di cocaina. Mesora a reconoce e chauffeur como e conocido di husticia, B.F. alias “Cabes di Clabo”. A pidi e otro dos pasaheronan pa sali for di auto. Durante listramento polisnan a bin haya un caha preto cu den dje tres saco di plastic cu yerba di marihuana den dje. Mas aleu, a haya tambe un gran cantidad di vloeipapier lora den forma di crus cu resto di marihuana poni aribe e dashboard. Tur esakinan a wordo tuma den beslag pa investigacion. A bay over na detencion di B.F., G.K. y D.E., tur naci na Aruba, pa violacion di e ley anti droga.
Durante cu a listra e detenidonan, den e tas di F., a bin haya algun dollars como tambe algun florin. E tas cu contenido a keda tuma den beslag pa mas informacion. Na warda di polis a sigui cu e investigacion y den e tas di F. a bin haya gran cantidad di placa, di diferente pais. Esaki a wordo tuma den beslag basa ariba e articulo 2:404 di e Wetboek van Strafrecht van Aruba. Esaki a wordo pasa pa Integraal Afpak Team Aruba pa mas investigacion. Afpakteam ta e departamento encarga cu e combatimento di criminalidad financiero economico. Crimen no ta paga.