Cu gran honor y anticipacion RAIZ ta presenta tres orador di prestigio y renombre pa amplia e conocemento di e publico presente durante nan simposio di diasabra awor, dia 9 di juni, na Universidad di Aruba.
Ta habri e anochi cu sr. Gian Nunes, un biologo marino local, gradua na Universidad di Groningen. Actualmente Gian ta fungi como investigador na Parke Nacional Arikok, un funccion cu el a bin ta ehecuta desde 2017. Sr. Nunes ta un di e motornan tras di “shark week”, un iniciativa cu, pa medio di diferente tayer y tambe anochinan informativo, ta educa e comunidad ariba e.o. e populacion di tribon na Aruba. Den pasado caba, uzando tecnologia den un forma avansa y hopi inventivo, Gian a forma parti di un team cu a sa di studia e populacion di tribon aki na Aruba pa algun luna largo. Di e forma aki a crea data cu ta relevante pa por saca conclusionnan importante encuanto e especienan di tribon den nos awanan teritorial.
Sra. Micheline Bury ta un orador na Universidad di Aruba for di aña 2014. Su experticio ta ariba tereno di ley constitucional, ley administrativo como tambe ley di medio ambiente. Sra. Bury a gradua cu distincion for di e facultad di ley di Universidad di Aruba na 2014. Su tesis tabata tin como titulo:”Naturalesa den peliger, derecho di naturalesa y ley di medio ambiente internacional”. Su tesis a hala atencion internacional door di su originalidad y enfoke innovativo cu ta pone bo refleha.
RAIZ cu a adopta e derechonan di naturalesa como un di e puntonan fuerte di su programa, awe ta sumamente orguyoso di por conta cu e contribucion di Sra. Natalia Greene, fundadora di e Derechonan di Naturalesa na su pais natal Ecuador. Sra. Greene, un ciudadano determina pa pone e topico aki ariba agenda na su pais, a logra ancra e ley aki den e constitucion di Ecuador. Awe, su pais ta beneficia di e derechonan di naturalesa cu ta proteha su tera natal contra manipulacion di e ser humano, minimalisando di e forma aki e impacto di desaroyo riba e medio ambiente. Sra. Greene ta forma parti di e “Global Alliance For the Rights of Nature”. Den su capacidad como experto den e area aki, e lo duna un charla sumamente interesante, divulgando su reto y logronan na Ecuador, y con Aruba por aplica e tactica di “best practice” pa eleva su potencial.