Confiansa di e consumidor a baha marginalmente den e prome trimester di 2017 segun e ultimo resultadonan di e Encuesta di Confiansa di Consumidor (CCS) di Banco Central di Aruba (BCA). E Indice di Confiansa di Consumidor a sera na 96,0 pa e di prome trimester di 2017, bahando cu 0,1 punto di indice compara cu e trimester anterior (mira Grafiek 1). E indice di confiansa di consumidor a move rond e nivel di 96 pa e ultimo tres trimesternan consecutivo indicando asina un persistencia den sentimentonan pesimista di e consumidor.
Consumidornan a evalua e situacion actual mas negativo compara cu seis luna pasa ya cu e Indice di Situacion Actual a cai cu 1,9 punto di indice te na 94,6. E expectativanan di e consumidor pa futuro a sigui e mesun rumbo ya cu e Indice di Expectativa a empeora te na 97,6, di 99,3 den e periodo anterior. Di otro banda, e Indice di Habito di Consumo y e Indice di Expectativa di Prijs a mehora cu 2,5 punto di indice y 1 punto di indice, respectivamente.
Consumidornan tabata pesimista riba e componentenan di condicionnan actual y esunnan di e futuro cercano den e di prome trimester di 2017. E grupo di consumidornan cu ta indica cu e condicionnan actual di negoshi y economia a empeora compara cu 6 luna pasa a crece significantemente di 32,3 porciento den e di cuatro trimester di 2016 te na 54,5 porciento den e prome trimester di 2017. Esaki tambe tabata e caso riba condicionnan di negoshi y economia pa futuro (di 18,3 porciento pa 29,8 porciento). Ademas, 50,1 porciento a sinti cu gobierno su posicion financiero actual a deteriora compara cu 6 luna pasa. Adicionalmente 37,5 porciento a percibi un empeoracion den e posicion financiero di gobierno pa e siguiente seis lunanan, mientras 20,0 porciento no sa con e posicion financiero di gobierno pa futuro lo desaroya. Tabata tin un subida chikito (di 14,0 porciento pa 16,5 porciento) den e grupo di consumidornan cu ta bisa cu haya un trabou lo ta mas facil den e siguiente 6 lunanan. Tambe tin un mehoracion den e parti di consumidor cu ta pensa cu lo ta mas dificil den e futuro cercano pa haya un trabou (un mehoracion di 44,5 porciento pa 37,5 porciento).
Tur componentenan di e Indice di Habito di Consumo a mehora den e prome trimester di 2017, asina mitigando e contraccion den e otro sub-indicenan di e CCS. Sinembargo, mayoria di consumidornan a indica cu no tabata apropia pa cumpra un auto (54,0 porciento), haci un prestamo (56,0 porciento) of un hipoteca (69,5 porciento), mientras cu esaki tabata un poco mas abou pa compra di aparatonan grandi (45,6 porciento) y bai riba vakantie (35,8 porciento). E resultadonan aki a pusha e Indice di Habito di Consumo pa 96,8 despues di a registra su punto mas abou di 94,3 den e trimester anterior. Finalmente, e Indice di Expectativa di Prijs a subi un poco, di 90,2 te 91,2. E mayoria di encuestadonan (69,3 porciento) ta spera cu prijsnan lo subi den e siguiente 6 lunanan.
Resumiendo, e caida minimo den confiansa di consumidor a wordo atribui na bahadanan den e Indice di e Situacion Actual y e Indice di Expectativa cual a wordo mitiga pa un mehoracion den e inclinacion di consumidornan pa haci compranan grandi.
Por obtene e resultadonan completo di e encuesta aki for di e website di BCA (www.cbaruba.org). Pa mas informacion por tuma contacto cu e Departamento di Research, na [email protected].