Diadomingo mainta tres grupo coral a presenta un concierto dirigi pa e inigualabel Mayra Kock di Asociacion Coral Ars Nova. IPA Koor, un coro nobo consistiendo di membronan di Instituto Paedagogico Aruba, a haci nan debut publico despues di apenas algun luna di practica cu Sra. Mayra. Batiendo nan man y cantando “Clap your hands” mientras nan a cana drenta e sala chikito di Cas di Cultura, e grupo a haci nan entrada gracioso. E programa hopi varia a duna tur presente algo pa nan gusto musical. Ivirgna Hernandez a canta “Beauty and the Beast” pa cera un debut exitoso di IPA Koor.
Cantare, un coro femenino “ruman di Ars Nova” tin 7 aña ta actua. Bisti cu nan uniform bunita (blusa salmou y carson preto) nan tambe a presenta un programa varia cu musica di obranan teatral, jazz, sacro y piesanan tradicional di Aruba, Corsou y Cuba. Melissa Werleman, otro studiante di canto di Sra. Mayra a duna un bunita interpretacion di “Memory” di Andrew Lloyd Webber. Nan pianista ta Sr. Jeremy Lanooij.
E atraccion principal Ars Nova, aunke cu nan tabata canta cu solamente tres soprano, a impresiona manera semper. Cu obranan di Bach, Padú. Handel, Mozart, Webber, Behilia, Romero, etc., e publico no por a keha pa falta di diversidad. E hit di e atardi tabata “Si mach’n kier”, un cantica di pueblo cu ta data di epoca di guera mundial. Cu un areglo di Sergio Morales y presenta pa Ars Nova bou di direccion di Mayra Kock, e cantica a haya un bon acogida. E duo Loella Hernandez y Clyde Milliard a duna un rendicion impresionante di “All I ask of you”.
Mientras e gruponan Ars Nova y Cantare tabata organizando pa canta hunto e ultimo piesa di e programa, derepente nan a stop y Sra. Jane Lanooij, kende ta canta pa tur dos coro, a duna un discurso na nomber di Asociacion Coral Ars Nova pa reconoce e trabou di un persona cu a bira parti di e asociacion. Y cu esaki a cuminsa un conmovedor homenahe y tributo na Sra. Suzanne Dings, pianista di Ars Nova. Pasobra el a perde su trabou aki, Sra. Dings lo biaha bek pa Hulanda na cuminsamento di otro luna.
Sra Lanooij a bisa entre otro,
… “Suzanne, bij welk verzoek dan ook, heb jij nooit ‘nee’ gezegd. Je was altijd bereid om jouw onvoorwaardelijke ondersteuning te geven aan onze beide koren. Je was altijd optimistisch, je was altijd verantwoordelijk en hoe druk je het ook had, je kwam altijd jouw afspraken na.”…
… “Iemand hebben leren kennen zoals jij en met jouw ervaringen hebben kunnen delen, maakt deze wereld zoveel meer waardevol en wonderschoon, zoals de titel van ons volgende lied luidt “What a wonderful world”.
Suzanne a keda conmovi y nos por a mira lagrimanan den su wowonan. Entre e publico tambe, hopi di nos mester a saca nos lenso pa seca nos wowonan. Un gesto sumamente conmovedor y bunita di e integrantenan di Ars Nova y Cantare.
Despues di e piesa precioso aki cu Satchmo Armstrong a pone den Hall of Fame Musical y diadomingo a wordo dedica na Suzanne, e publico a sclama pa mas, y e coronan a complace cu un reprise di “Si machi’n kier”. Tabata un ceramento contento di un atardi musical inolvidabel. Danki, Mayra y Edwin Kock. Danki Ars Nova, Cantare y IPA KOOR. Danki Suzanne, het ga je goed!