Stress ta e conhunto ey di reaccion di e curpa den desafio of demanda. Ta trata di un proceso natural cu ta responde na nos necesidad di adapta na e entorno.
Al contrario di loke hopi ta kere, ta existi un tipo di stress cu ta positivo y ta produci den episodionan chikito, manera por ehempel ora cu e ta yudabo evita un peliger determina of na cumpli cu un fecha limite (deadline). Sin embargo, ta bolbe perhudicial pa salud ora cu e ta hopi intenso of ta incrementa den un largo plazo.
Segun estudio, publica pa The American Journal of Cardiology, e personanan cu un nivel halto di stress, tin un 27% mas di riesgo di padece un enfermedad cardiaco. Esaki ta indica cu e stress ta claramente un factor di riesgo mas pa controla, mescos cu e hipertension arterial y colesterol halto. Por lo tanto, ta sumamente importante presta atencion ya cu por afecta nos salud si ta instala den nos bida cotidiana.
“Stress por causa tipo di sintomanan fisico y emocional. Den algun caso, ta posibel cu uno no ta ripara cu e sintomanan aki ta wordo ocasiona pa stress,” dokter Alejandro Deviggiano, Coordinador di Departamento di Estudionan Cardiovascular no Invasivo di Diagnostico Maipu, a splica Infobae.
Y el a señala algun di e signonan mas frecuente:
Emocion: depresion of ansiedad, iritabilidad, miedo.
Pensamento: excesivo temor na fracaso, excesivo autocritica, olvido, dificultad pa conecta.
Conducta: trato bruto na otro, incremento di consumo di tabaco, alcohol y otro droga.
Cambionan fisico: tension muscular, mannan friu of sudoroso, insomnio, dolornan di cabes, indigestion.
Tiponan di stres dañino pa bo curason
Ta importante tene na cuenta cu stress constante por tensiona bo curason di varios manera; incrementando e balornan di colesterol y triglicerido den sanger y aumentando e presion arterial.
Ademas, stress extremo por haci cu bo curason ta bati fo’i ritmo.
Conoce e distinto tiponan di stress ta necesario pa sa ora cu tin cu actua pa remedi’e:
Stress agudo: ta trata di e forma di stress mas comun. Ta surgi di e exigencianan cu nos ta impone riba nos mes of otro. E ta sosoden den periodonan cortico debi por lo general na un causa pasahero manera biahe, un examen of un cambio di trabao. Den dosisnan chikito por ta positivo pero den dosis mas eleva por afecta nos salud provocando dolornan muscular, problemanan di stoma y intestinal, sobreexitacion pasahero, dolornan di cabes y agotamiento.
Stress cronico: ta e tipo di stress mas agotador y desgastante. E ta tuma luga ora cu uno no ta haya un salida na un problema of situacion cu ta deprimi’e. Ta producto, por ehempel, di un trabao of carera no desea, problemanan di placa of un matrimonio infeliz. E diferencia di stress agudo, ta presenta uno tras di otro di forma ripiti a lo largo di tempo. Ta produci desgaste fisico y psicologico, cu por desencadena den depresion, crisis nervioso y hasta un atake cardiaco.
Stress ta afecta e muhe mas
“Homber y muhenan ta vulnerabel na sufri stress, aunke ambos ta experimenta di distinto manera. Estudionan medico a confirma cu stress no ta afecta nos tur na e mesun manera. Muhenan ta mas propenso cu hende homber den mustra sintomanan di dificultad cardiaco despues di situacionnan estresante y sobresaltonan emocional,” Deviggiano a precisa.
Y el a agrega cu “kibra cu e pareha, perde un familiar of un fuerte discusion por desencadena den cual ta conoce como e “Sindrome di e Curason Kibra,” unda e afectadonan principal sa ta hende muhe post-menopausica di entre 55 y 75 aña.”
Tecnica pa maneha stress
Confronta stress lo permiti nos hiba un miho calidad di bida. Ademas di come sano, drumi bon y haci ehercicio, ta recomendabel considera e siguiente tecnicanan:
Reconoce y acepta e cosnan cu no por wordo cambia, laga nan bay. Por ehempel, no por cambia e hecho di tin cu maneha durante e ora y pico, pero bo por busca manera di relaha bo mes den e trayecto, con pa scucha bo musica preferi of un audiobook.
Cambia e perspectiva. Purba desaroya un actitud mas positivo dilanti e desafionan. Semper por wak e “glas mita yen.”
Siña maneranan pa relaha. Yuda na disminui e ritmo cardiaco y reduci e presion di sanger. Ta existi hopi manera, desde respiracionnan profundo y meditacion te na yoga.
Conecta cu bo sernan keri. No laga cu stress interpone den bo bida social. Pasa tempo cu famia y amigonan por yuda pa bo sinti miho. Confia bo problemanan cu un amigo tambe por yuda resolve nan.
Siña bisa no. Si bo stress ta origina door di realisa demasiado trabao na cas of na trabao, establece limite, ta fundamental pa ekilibra.
Fuente: www.infobae.com