Via rednan social ya caba ciudadanonan a cuminsa mustra nan preocupacion ariba e prijsnan di productonan basico, manera fruta cu ya caba a subi. Fruta, berdura, webo y hopi otro productonan a subi ya caba y esaki ta ainda sin e introduccion di BAVP di 3.5%
Desde cu frontera cu Venezuela a keda cera pa un tempo, e scarsedad di fruta y berdura a wordo sinti. Esaki a pone tambe cu mester a importa for di otro paisnan, pero consecuencia di esaki ta tambe, cu e prijsnan tambe a bay halto. E cuestion di frontera, entre tanto a keda soluciona, pero esey no kiermen cu prijsnan a baha. Ta parce cu dia pa dia, mas y mas nan ta keda subi.
Por mira p.e. con un caha di webo ta costa ariba 14 florin, banana ta costa 2 florin, un awacati ta costa 12 florin! Ciudadanonan preocupa ta puntra nan mes, ta con nan lo haci sobrevivi despues di dia 1 di juli cu e introduccion di e BAVP?
Pregunta ta keda e ora, tin control di parti di Economische Zaken ariba prijsnan aki? Otro pregunta ta tambe, si e comerciante no ta paga invoerrechten ariba e fruta cu berdura, cual ta e motibo cu e prijsnan ta asina halto?? Esakinan ta preguntanan cu e pueblo ta spera cu mandatarionan duna un splicacion, pero uno duidelijk!
Cuanto mas e pueblo lo por wanta cu e subida di prijsnan aki. Ta spera cu gobierno atende cu e problematica awe, ya cu despues di juli, comerciantenan ta cuminsa prepara pa fin di aña y esaki por genera un caos den prijsnan exorbitante cu tin actualmente.