Diasabra 10 di Juni venidero Comunidad Portugues na Aruba ta celebra 52 aña di
Existencia. Pa e gran celebracion aki cu ya ta un custumber di tur aña na Aruba esta dia Nacional di Portugal dia di Luis vas de Camoes y dia di Comunidad Portugues rond mundo lo tin acto protocolar na Wilhelmina Park pa 10or di mainta.
E prome celebracion a tuma luga na aña 1965 unda Sr. Aventura Quimarais cual persona a nace Dia 9 di Maart 1927 na Portugal y na edad di 36 aña e la imigra pa Aruba, su ofishi tabata welderdo, pero e tabata un welderdo masha peculiar pa su forma artistico di traha.
E tabata conoci como e homber cu tabata biba dilanti di Elmar na Playa. Su persona a tuma e iniciativa pa e tempo ey celebra DIA DI PORTUGAL aki na Aruba conhuntamente cu un grupo chikito di Portuguesnan y a marcha for di su cas (cu tawata situa dilanti Elmar na playa) pa Wilhelmina Park. E Grupo di Portuguesnan aki den forma hopi emocional a bini hunto pa asina gradici Aruba pa e bon aceptacion di e Portuguesnan na Aruba.
Sr. Ventura a fayece November 17, 1993. Sinembargo, comunidad Portugues semper lo keda record’e. Portuguesnan ta conoci pa ta hende hopi balente y cu ta lucha te na fin, nan a contribui den economia di Aruba den aña nan 65, 70 y 80
cual nan tabata eherce trabou nan duro y pisa. Portuguesnan tabata busca un futuro pa nan famia y no ta importa e trabou, mas bien ta importa nan e dignidad pa por tin un trabou y cu un dia nan lo logra nan meta.
Pa algun di nan esaki tabata un disparate of kisas un cos no mucho bon pa haci pero a sali for di nan pais pa traha y gana loke sea, pa asina spaar y pa den nan futuro bolbe bek nan tera natal. Esaki tabata e deseo di mayoria di nan, pero na caminda esaki a cambia. T’asina a sosode cu Portuguesnan poco poco tambe a cuminsa integra den e sociedad Arubiano y unda nan a eherce diferente funcion den comunidad y educa nan famia y ainda nan ta aki y hasta dera na e dushi isla aki di
Aruba.
Nan exito ta sin duda di tin e capacidad di por adapta den diferente ambiente/cultura, mientras cu na mes momento nan ta mantene bibo y practica e balornan di nan origen. P’e mes motibo aki nos ta gradici Aruba pa a acepta nos como parti di nan, nos ta sinti nos mes hopi orguyoso di forma parti di e isla aki y ainda nos ta parti di desaroyo di Aruba.
E dia aki nos lo honra 2 Portugues activo y asina gradici nan pa nan dedicacion y nan gran aporte y esfuerso. Como cu nan ta contribui semper na bienestar di nos Club Portugues y den e trayecto di Celebracion di Dia Nacional di Portugal esaki ta como agradecimento y asina duna e personanan aki nan merecido honor.
LUIS VAS DE CAMOES
Luis Vaz de Camoes tabata tin un bida turbulento, su aparencio inkieto no a permiti’e e sigui traha na e corte di Dr. Juan Tercero, pero a wordo manda guera na Morroco, eynan ela perde su wowo banda drechi. Despues ela bai Portugal bek, pero na 1553 ela sali riba un aventura pa Oriente, durante su biahenan e tabata compone su poemanan. Despues di 16 aña ela regresa Portugal, e la yega pober y cansa, pero apunto di termina su obra pa e ofrece su Patria un obra cu un prijs impagable“Os Lousíadas”. Luis Vaz de Camoes ta ser considera como e ‘Shakespeare Portugues’ pa su gran talento como poeta. Añanan despues cu Portugal a cay den e dominio Spaño, e patriotismo di e poeta a sufri un dolor inmenso e tempo ey.
Ela fayece dia 10 di Juni 1580, e poco dia prome cu ela muri ela skirbi:
Enfin, bida lo caba, tur lo mira cu ami tabata amigo di mi patria y cu lo mi prefera no solamente di muri na mi patria pero … cu mi patria.
Luis Vaz de Camoes
BANDERA PORTUGUES
Den centro di e bandera nos por mira 5 mini escudo blau scur cu ta simboliza e 5 reynan Moros cu Don Afonso Henriques a vence durante bataya di Ourique. E puntonan den e mini escudonan ta representa e 5 yaganan di Cristo dor cu historia ta conta cu durante bataya di Ourique, Hesus Cristo crucifica a aparece na Don Afonso Henriques y a bis’e cu e ta bay gana e bataya.
E 7 kasteelnan ta simboliza e localidad nan fortifica di Don Afonso Henriques. E esfera armilar color geel ta representa e instrumento di nabegacion den un diseño estiliza. E berde ta simboliza Speranza, e color cora ta simboliza e corahe y e sanger di e Portuguesnan durante e bataya. E diseño di e bandera di Portugal cu a keda oficialisa na aña 1891 tawata den man di 3 persona cu tawata masha destaca na fin di siglo 19: Columbano Bordalo Pinheiro (pintor artistico), Joao Chagas (diplomatico) y Abel Botelho (diplomatico).
Celebracion dia Nacional di Portugal
E programa pa e gran celebracion ta como lo siguiente:
Di 7or pa 9or di anochi nos lo tin e gastronomía Portugués, lo tin na benta dushi platonan típico Portugués manera
“Rancho a Portuguesa” “Bacalhao com Natas” “Bacalhao a la Portuguesa”, “Caldo Verde” y nos famoso “Espetada com Bolo do Caco”. Tambe lo tin algun dushi pasaboca manera Bolo de mel/honing, Broas/cuki, Pan dushi y hopi mas.
For di 9 or pa 10’or publico presente lo deleita nan mes cu e Show Cultural Portugues cu declamacion di Poesia, presentacion di Baile Folclorico y Canto Portugues. Y e Fiesta ta sigui despues di 10or cu animacion di Banda Portugues invita di exterior ALMA LUSA.
Directiva FSCP ta invita henter pueblo di Aruba y e Portuguesnan residencia aki na Aruba pa bin y celebra dia di Portugal hunto cu nos na nos Club Portugues situa na Primavera.
Nos kier a gradici tur esnan cu di un of otro forma a yuda nos Club Portugues. Nos ta masha agradecido pa boso contribucion for di henter nos curason…MUITO OBRIGADO.